suraj hun zindagi ki ramaq chhoD jaunga

sūraj huuñ zindagī kī ramaq chhoḌ jā.ūñgā

maiñ Duub bhī gayā to shafaq chhoḌ jā.ūñgā

tārīḳh-e-karbalā-e-suḳhan! dekhnā ki maiñ

ḳhūn-e-jigar se likh ke varaq chhoḌ jā.ūñgā

ik raushnī kī maut marūñgā zamīn par

jiine kā is jahān meñ haq chhoḌ jā.ūñgā

ro.eñge merī yaad meñ mahr o mah o nujūm

in ā.inoñ meñ aks-e-qalaq chhoḌ jā.ūñgā

vo os ke daraḳht lagā.ūñgā jā-ba-jā

har buuñd meñ lahū kī ramaq chhoḌ jā.ūñgā

guzrūñgā shahr-e-sañg se jab aa.ina liye

chehre khule darīchoñ meñ faq chhoḌ jā.ūñgā

pahuñchūñgā sehn-e-bāġh meñ shabnam-rutoñ ke saath

sūkhe hue guloñ meñ araq chhoḌ jā.ūñgā

har-sū lageñge mujh se sadāqat ke ishtihār

har-sū mohabbatoñ ke sabaq chhoḌ jā.ūñgā

'sājid' gulāb-chāl chalūñgā ravish ravish

dhartī pe gulistān-e-shafaq chhoḌ jā.ūñgā

suraj hun zindagi ki ramaq chhoD jaunga

main Dub bhi gaya to shafaq chhoD jaunga

tariKH-e-karbala-e-suKHan! dekhna ki main

KHun-e-jigar se likh ke waraq chhoD jaunga

ek raushni ki maut marunga zamin par

jine ka is jahan mein haq chhoD jaunga

roenge meri yaad mein mahr o mah o nujum

in aainon mein aks-e-qalaq chhoD jaunga

wo os ke daraKHt lagaunga ja-ba-ja

har bund mein lahu ki ramaq chhoD jaunga

guzrunga shahr-e-sang se jab aaina liye

chehre khule darichon mein faq chhoD jaunga

pahunchunga sehn-e-bagh mein shabnam-ruton ke sath

sukhe hue gulon mein araq chhoD jaunga

har-su lagenge mujh se sadaqat ke ishtihaar

har-su mohabbaton ke sabaq chhoD jaunga

'sajid' gulab-chaal chalunga rawish rawish

dharti pe gulistan-e-shafaq chhoD jaunga