sham-o-gul ne saj to di mahfil teri tere baghair

sham-o-gul ne saj to dī mahfil tirī tere baġhair

vo rahī apnī jagah jo thī kamī tere baġhair

āmad-o-raft-e-nafas dushvār thī tere baġhair

ek nashtar sā chubhā jab saañs lī tere baġhair

ho ga.iiñ thiiñ sab bhalī bāteñ burī tere baġhair

haañ magar achchhī huī to shā.irī tere baġhair

haa.e dil jis kī umañgeñ thiiñ bahāreñ baaġh kī

vo mirī jannat jahannam ban ga.ī tere baġhair

thā bahut mumkin ki bach jaatī ġham-e-duniyā se jaan

sach to ye hai ham ne koshish bhī na kī tere baġhair

mujh ko rone se mile fursat to phir DhūñDūñ use

hañs rahā hai kaun qismat kā dhanī tere baġhair

jaane vaale jā ḳhudā hāfiz magar ye soch le

kuchh se kuchh ho jā.egī dīvāngī tere baġhair

tere dīvāne bhī puuje jā.eñge ik din yuuñ hī

ho rahī hai jaise terī bandagī tere baġhair

terā 'manzar' jo kabhī thā andalīb-e-ḳhush-navā

kho gayā duniyā se yuuñ chup saadh lī tere baġhair

sham-o-gul ne saj to di mahfil teri tere baghair

wo rahi apni jagah jo thi kami tere baghair

aamad-o-raft-e-nafas dushwar thi tere baghair

ek nashtar sa chubha jab sans li tere baghair

ho gain thin sab bhali baaten buri tere baghair

han magar achchhi hui to shairi tere baghair

hae dil jis ki umangen thin bahaaren bagh ki

wo meri jannat jahannam ban gai tere baghair

tha bahut mumkin ki bach jati gham-e-duniya se jaan

sach to ye hai hum ne koshish bhi na ki tere baghair

mujh ko rone se mile fursat to phir DhunDun use

hans raha hai kaun qismat ka dhani tere baghair

jaane wale ja KHuda hafiz magar ye soch le

kuchh se kuchh ho jaegi diwangi tere baghair

tere diwane bhi puje jaenge ek din yun hi

ho rahi hai jaise teri bandagi tere baghair

tera 'manzar' jo kabhi tha andalib-e-KHush-nawa

kho gaya duniya se yun chup sadh li tere baghair