shaKH-e-mizhgan-e-mohabbat pe saja le mujhko

shāḳh-e-mizhgān-e-mohabbat pe sajā le mujh ko

barg-e-āvāra huuñ sarsar se bachā le mujh ko

rāt-bhar chāñd kī ThanDak meñ sulagtā hai badan

koī tanhā.ī ke dozaḳh se nikāle mujh ko

duur rah ke bhī hai har saañs meñ ḳhushbū terī

maiñ mahak jā.ūñ jo tū paas bulā le mujh ko

maiñ tirī aañkh se Dhalkā huā ik aañsū huuñ

tū agar chāhe bikharne se bachā le mujh ko

shab ġhanīmat thī ki ye zaḳhm-e-nazāra to na thā

Das ga.e sub.h-e-tamannā ke ujāle mujh ko

maiñ munaqqash huuñ tirī ruuh kī dīvāroñ par

tū miTā saktā nahīñ bhūlne vaale mujh ko

sub.h se shaam huī rūThā huā baiThā huuñ

koī aisā nahīñ aa kar jo manā le mujh ko

tah-ba-tah mauj-e-talab khīñch rahī hai 'mohsin'

koī girdāb-e-tamannā se nikāle mujh ko

shaKH-e-mizhgan-e-mohabbat pe saja le mujh ko

barg-e-awara hun sarsar se bacha le mujh ko

raat-bhar chand ki ThanDak mein sulagta hai badan

koi tanhai ke dozaKH se nikale mujh ko

dur rah ke bhi hai har sans mein KHushbu teri

main mahak jaun jo tu pas bula le mujh ko

main teri aankh se Dhalka hua ek aansu hun

tu agar chahe bikharne se bacha le mujh ko

shab ghanimat thi ki ye zaKHm-e-nazara to na tha

Das gae subh-e-tamanna ke ujale mujh ko

main munaqqash hun teri ruh ki diwaron par

tu miTa sakta nahin bhulne wale mujh ko

subh se sham hui ruTha hua baiTha hun

koi aisa nahin aa kar jo mana le mujh ko

tah-ba-tah mauj-e-talab khinch rahi hai 'mohsin'

koi girdab-e-tamanna se nikale mujh ko