san li sada-e-koh-e-nida aur chal paDe

san lī sadā-e-koh-e-nidā aur chal paḌe

ham ne kisī se kuchh na kahā aur chal paḌe

saa.e meñ do ghaḌī bhī na Thahre guzarte log

peḌoñ pe apnā naam likhā aur chal paḌe

Thahrī huī fazā meñ ulajhne lagā thā dam

ham ne huā kā giit sunā aur chal paḌe

tārīk rāstoñ kā safar sahl thā hameñ

raushan kiyā lahū kā diyā aur chal paḌe

raḳht-e-safar jo paas hamāre na thā to kyā

shauq-e-safar ko saath liyā aur chal paḌe

ghar meñ rahā thā kaun ki ruḳhsat kare hameñ

chaukhaT ko alvidā.a kahā aur chal paḌe

'maḳhmūr' vāpsī kā irāda na thā magar

dar ko khulā hī chhoḌ diyā aur chal paḌe

san li sada-e-koh-e-nida aur chal paDe

hum ne kisi se kuchh na kaha aur chal paDe

sae mein do ghaDi bhi na Thahre guzarte log

peDon pe apna nam likha aur chal paDe

Thahri hui faza mein ulajhne laga tha dam

hum ne hua ka git suna aur chal paDe

tarik raston ka safar sahl tha hamein

raushan kiya lahu ka diya aur chal paDe

raKHt-e-safar jo pas hamare na tha to kya

shauq-e-safar ko sath liya aur chal paDe

ghar mein raha tha kaun ki ruKHsat kare hamein

chaukhaT ko alwidaa kaha aur chal paDe

'maKHmur' wapsi ka irada na tha magar

dar ko khula hi chhoD diya aur chal paDe