ruka hun kis ke wahm mein mere guman mein nahin

rukā huuñ kis ke vahm meñ mire gumān meñ nahīñ

charāġh jal rahā hai aur koī makān meñ nahīñ

vo tā.ir-e-nigāh bhī safar meñ saath hai mire

ki jis kā zikr tak abhī kisī uḌaan meñ nahīñ

mirī talab mire liye malāl chhoḌ kar ga.ī

jo shai mujhe pasand hai vahī dukān meñ nahīñ

koī ajiib ḳhvāb thā agar maiñ yaad kar sukūñ

koī ajiib baat thī magar vo dhyān meñ nahīñ

vo dushmanī kī shaan se mile to dil meñ rah ga.e

magar ye baat dostī kī ān-bān meñ nahīñ

maiñ rizq-e-ḳhvāb ho ke bhī usī ḳhayāl meñ rahā

vo kaun hai jo zindagī ke imtihān meñ nahīñ

vo ḳhvāb shām-e-hijr meñ sahar kī aas thā mujhe

magar vo tere vasl kī khulī amaan meñ nahīñ

ruka hun kis ke wahm mein mere guman mein nahin

charagh jal raha hai aur koi makan mein nahin

wo tair-e-nigah bhi safar mein sath hai mere

ki jis ka zikr tak abhi kisi uDan mein nahin

meri talab mere liye malal chhoD kar gai

jo shai mujhe pasand hai wahi dukan mein nahin

koi ajib KHwab tha agar main yaad kar sukun

koi ajib baat thi magar wo dhyan mein nahin

wo dushmani ki shan se mile to dil mein rah gae

magar ye baat dosti ki aan-ban mein nahin

main rizq-e-KHwab ho ke bhi usi KHayal mein raha

wo kaun hai jo zindagi ke imtihan mein nahin

wo KHwab sham-e-hijr mein sahar ki aas tha mujhe

magar wo tere wasl ki khuli aman mein nahin