raaz-e-darun-e-astin kashmakash-e-bayan mein tha

rāz-e-darūn-e-āstīñ kashmakash-e-bayāñ meñ thā

aag abhī nafas meñ thī sho.ala abhī zabāñ meñ thā

vo jo kahīñ thā vo bhī maiñ aur jo nahīñ thā vo bhī maiñ

aap hī thā zamīn par aap hī āsmāñ meñ thā

lams-e-sadā-e-sāz ne zaḳhm nihāl kar diye

ye to vahī hunar hai jo dast-e-tabīb-e-jāñ meñ thā

ḳhvāb-e-ziyāñ haiñ umr kā ḳhvāb haiñ hāsil-e-hayāt

is kā bhī thā yaqīñ mujhe vo bhī mire gumāñ meñ thā

ḳhanjar o dashna o sināñ ye to bahāne haiñ miyāñ

aap na sharmsār hoñ zaḳhm sirisht-e-jāñ meñ thā

hadd-e-gumāñ se ek shaḳhs duur kahīñ chalā gayā

maiñ bhī vahīñ chalā gayā maiñ bhī guzishtagāñ meñ thā

raaz-e-darun-e-astin kashmakash-e-bayan mein tha

aag abhi nafas mein thi shoala abhi zaban mein tha

wo jo kahin tha wo bhi main aur jo nahin tha wo bhi main

aap hi tha zamin par aap hi aasman mein tha

lams-e-sada-e-saz ne zaKHm nihaal kar diye

ye to wahi hunar hai jo dast-e-tabib-e-jaan mein tha

KHwab-e-ziyan hain umr ka KHwab hain hasil-e-hayat

is ka bhi tha yaqin mujhe wo bhi mere guman mein tha

KHanjar o dashna o sinan ye to bahane hain miyan

aap na sharmsar hon zaKHm sirisht-e-jaan mein tha

hadd-e-guman se ek shaKHs dur kahin chala gaya

main bhi wahin chala gaya main bhi guzishtagan mein tha