pyar apne pe jo aata hai to kya karte hain

pyaar apne pe jo aatā hai to kyā karte haiñ

ā.īna dekh ke muñh chuum liyā karte haiñ

vasl kā lutf mujhe vasl se pahle hī milā

jab kahā yaar ne ghabrā ke ye kyā karte haiñ

is qadar thā mujhe ulfat meñ bharosā un par

kī jafā bhī to ye samjhā ki vafā karte haiñ

hai yahī arz ḳhudā se ki fulāñ but mil jaa.e

vahī achchhe jo namāzoñ meñ duā karte haiñ

lab kisī ke jo hile kaan udhar dhyān udhar

dil lagā kar vo mirā zikr sunā karte haiñ

subah ko dekh ke ā.īne meñ bose kā nishāñ

muskurāte hue hoñToñ meñ gilā karte haiñ

kaise kaise mujhe be-sāḳhta milte haiñ ḳhitāb

ġhussa aatā hai to kyā kyā vo kahā karte haiñ

kyā huā mujh ko raqīboñ ne agar dī tāzīm

terī mahfil meñ to fitne hī uThā karte haiñ

kaan bātoñ kī taraf aañkh hai kāmoñ kī taraf

ho ke anjān mirā zikr sunā karte haiñ

chiin peshānī pe hai mauj-e-tabassum lab meñ

aise hañsmukh haiñ ki ġhusse meñ hañsā karte haiñ

bas to chaltā nahīñ kuchh kah ke unheñ kyuuñ hoñ zalīl

ham to apnā hī lahū aap piyā karte haiñ

is ishāre ke fidā aise tajāhul ke nisār

maar kar aañkh vo muñh pher liyā karte haiñ

jalse hī jalse haiñ jab se vo hue ḳhud-muḳhtār

koī itnā nahīñ kahtā ki ye kyā karte haiñ

āshiqāna hai aqīda bhī hamārā 'mā.il'

le ke ham nām-e-butāñ zikr-e-ḳhudā karte haiñ

pyar apne pe jo aata hai to kya karte hain

aaina dekh ke munh chum liya karte hain

wasl ka lutf mujhe wasl se pahle hi mila

jab kaha yar ne ghabra ke ye kya karte hain

is qadar tha mujhe ulfat mein bharosa un par

ki jafa bhi to ye samjha ki wafa karte hain

hai yahi arz KHuda se ki fulan but mil jae

wahi achchhe jo namazon mein dua karte hain

lab kisi ke jo hile kan udhar dhyan udhar

dil laga kar wo mera zikr suna karte hain

subah ko dekh ke aaine mein bose ka nishan

muskuraate hue honTon mein gila karte hain

kaise kaise mujhe be-saKHta milte hain KHitab

ghussa aata hai to kya kya wo kaha karte hain

kya hua mujh ko raqibon ne agar di tazim

teri mahfil mein to fitne hi uTha karte hain

kan baaton ki taraf aankh hai kaamon ki taraf

ho ke anjaan mera zikr suna karte hain

chin peshani pe hai mauj-e-tabassum lab mein

aise hansmukh hain ki ghusse mein hansa karte hain

bas to chalta nahin kuchh kah ke unhen kyun hon zalil

hum to apna hi lahu aap piya karte hain

is ishaare ke fida aise tajahul ke nisar

mar kar aankh wo munh pher liya karte hain

jalse hi jalse hain jab se wo hue KHud-muKHtar

koi itna nahin kahta ki ye kya karte hain

aashiqana hai aqida bhi hamara 'mail'

le ke hum nam-e-butan zikr-e-KHuda karte hain