phul the rang the lamhon ki sabahat hum the

phuul the rañg the lamhoñ kī sabāhat ham the

aise zinda the ki jiine kī alāmat ham the

sab ḳhirad-mand bane phirte the māshā-allāh

bas tire shahr meñ ik sāhib-e-vahshat ham the

naam baḳhshā hai tujhe kis ke vufūr-e-ġham ne

gar koī thā to tire mujrim-e-shohrat ham the

ab to ḳhud apnī zarūrat bhī nahīñ hai ham ko

vo bhī din the ki kabhī terī zarūrat ham the

dhuup ke dasht meñ kitnā vo hameñ DhūñDtā thā

'e'tibār' us ke liye abr kī sūrat ham the

phul the rang the lamhon ki sabahat hum the

aise zinda the ki jine ki alamat hum the

sab KHirad-mand bane phirte the masha-allah

bas tere shahr mein ek sahib-e-wahshat hum the

nam baKHsha hai tujhe kis ke wufur-e-gham ne

gar koi tha to tere mujrim-e-shohrat hum the

ab to KHud apni zarurat bhi nahin hai hum ko

wo bhi din the ki kabhi teri zarurat hum the

dhup ke dasht mein kitna wo hamein DhunDta tha

'e'tibar' us ke liye abr ki surat hum the