nind mein khulte hue KHwab ki uryani par

niind meñ khulte hue ḳhvāb kī uryānī par

maiñ ne bosa diyā mahtāb kī peshānī par

is qabīle meñ koī ishq se vāqif hī nahīñ

log hañste haiñ mirī chāk-girebānī par

nazar aatī hai tujh aisoñ ko shabāhat apnī

maiñ ne tasvīr banā.ī thī kabhī paanī par

ham faqīroñ ko isī ḳhaak se nisbat hai bahut

ham na baiTheñge tire taḳht-e-sulaimānī par

us se kuchh ḳhaas ta.alluq bhī nahīñ hai apnā

maiñ pareshān huā jis kī pareshānī par

paas hai lafz kī hurmat kā vagarna 'āzar'

koī tamġha to nahīñ miltā ġhazal-ḳhvānī par

nind mein khulte hue KHwab ki uryani par

main ne bosa diya mahtab ki peshani par

is qabile mein koi ishq se waqif hi nahin

log hanste hain meri chaak-girebani par

nazar aati hai tujh aison ko shabahat apni

main ne taswir banai thi kabhi pani par

hum faqiron ko isi KHak se nisbat hai bahut

hum na baiThenge tere taKHt-e-sulaimani par

us se kuchh KHas talluq bhi nahin hai apna

main pareshan hua jis ki pareshani par

pas hai lafz ki hurmat ka wagarna 'azar'

koi tamgha to nahin milta ghazal-KHwani par