naslen jo andhere ke mahazon pe laDi hain

nasleñ jo añdhere ke mahāzoñ pe laḌī haiñ

ab din ke kaTahre meñ ḳhatā-vār khaḌī haiñ

be-nām sī āvāz-e-shaguft aa.ī kahīñ se

kuchh patiyāñ shāyad shajar-e-shab se jhaḌī haiñ

nikleñ to shikastoñ ke añdhere ubal aa.eñ

rahne do jo kirneñ mirī āñkhoñ meñ gaḌī haiñ

aa Duub! ubharnā hai tujhe agle nagar meñ

manzil bhī bulātī hai salībeñ bhī khaḌī haiñ

jab paas kabhī jaa.eñ to paT bheḌ leñ khaT se

kyā laḌkiyāñ sapne ke darīchoñ meñ khaḌī haiñ

kyā raat ke āshob meñ vo ḳhud se laḌā thā

ā.īñe ke chehre pe ḳharāsheñ sī paḌī haiñ

ḳhāmoshiyāñ us sāhil-e-āvāz se aage

pātāl se gahrī haiñ, samundar se baḌī haiñ

naslen jo andhere ke mahazon pe laDi hain

ab din ke kaTahre mein KHata-war khaDi hain

be-nam si aawaz-e-shaguft aai kahin se

kuchh patiyan shayad shajar-e-shab se jhaDi hain

niklen to shikaston ke andhere ubal aaen

rahne do jo kirnen meri aankhon mein gaDi hain

aa Dub! ubharna hai tujhe agle nagar mein

manzil bhi bulati hai saliben bhi khaDi hain

jab pas kabhi jaen to paT bheD len khaT se

kya laDkiyan sapne ke darichon mein khaDi hain

kya raat ke aashob mein wo KHud se laDa tha

aaine ke chehre pe KHarashen si paDi hain

KHamoshiyan us sahil-e-awaz se aage

patal se gahri hain, samundar se baDi hain