nai duniya mujassam dilkashi malum hoti hai

na.ī duniyā mujassam dilkashī ma.alūm hotī hai

magar is husn meñ dil kī kamī ma.alūm hotī hai

hijāboñ meñ nasīm-e-zindagī ma.alūm hotī hai

kisī dāman kī halkī thartharī ma.alūm hotī hai

mirī rātoñ kī ḳhunkī hai tire gesu-e-pur-ḳham meñ

ye baḌhtī chhāñv bhī kitnī ghanī ma.alūm hotī hai

vo achchhā thā jo beḌā mauj ke rahm o karam par thā

ḳhizar aa.e to kashtī Dūbtī ma.alūm hotī hai

ye dil kī tishnagī hai yā nazar kī pyaas hai saaqī

har ik botal jo ḳhālī hai bharī ma.alūm hotī hai

dam-e-āḳhir mudāva-e-dil-e-bīmār kyā ma.anī

mujhe chhoḌo ki mujh ko niiñd sī ma.alūm hotī hai

diyā ḳhāmosh hai lekin kisī kā dil to jaltā hai

chale aao jahāñ tak raushnī ma.alūm hotī hai

nasīm-e-zindagī ke soz se murjhā.ī jaatī hai

ye hastī phuul kī ik pañkhuḌī ma.alūm hotī hai

jidhar dekhā 'nushūr' ik ālam-e-dīgar nazar aayā

musībat meñ ye duniyā ajnabī ma.alūm hotī hai

nai duniya mujassam dilkashi malum hoti hai

magar is husn mein dil ki kami malum hoti hai

hijabon mein nasim-e-zindagi malum hoti hai

kisi daman ki halki tharthari malum hoti hai

meri raaton ki KHunki hai tere gesu-e-pur-KHam mein

ye baDhti chhanw bhi kitni ghani malum hoti hai

wo achchha tha jo beDa mauj ke rahm o karam par tha

KHizar aae to kashti Dubti malum hoti hai

ye dil ki tishnagi hai ya nazar ki pyas hai saqi

har ek botal jo KHali hai bhari malum hoti hai

dam-e-aKHir mudawa-e-dil-e-bimar kya mani

mujhe chhoDo ki mujh ko nind si malum hoti hai

diya KHamosh hai lekin kisi ka dil to jalta hai

chale aao jahan tak raushni malum hoti hai

nasim-e-zindagi ke soz se murjhai jati hai

ye hasti phul ki ek pankhuDi malum hoti hai

jidhar dekha 'nushur' ek aalam-e-digar nazar aaya

musibat mein ye duniya ajnabi malum hoti hai