nae jhagDe nirali kawishen ijad karte hain

na.e jhagḌe nirālī kāvisheñ ījād karte haiñ

vatan kī aabrū ahl-e-vatan barbād karte haiñ

havā meñ uḌ ke sair-e-ālam-e-ījād karte haiñ

farishte dañg haiñ vo kaam ādam-zād karte haiñ

nayā maslak nayā rañg-e-suḳhan ījād karte haiñ

urūs-e-sher ko ham qaid se āzād karte haiñ

matā-e-pās-e-ġhairat bul-havas barbād karte haiñ

lab-e-ḳhāmosh ko sharminda-e-faryād karte haiñ

havā-e-tāza pā kar bostāñ ko yaad karte haiñ

asīrān-e-qafas vaqt-e-sahar fariyād karte haiñ

zarā ai kunj-e-marqad yaad rakhnā us hamiyyat ko

ki ghar vīrān kar ke ham tujhe ābād karte haiñ

har ik ḳhisht-e-kuhan afsāna-e-derīna kahtī hai

zabān-e-hāl se TuuTe khañDar fariyād karte haiñ

balā-e-jāñ haiñ ye tasbīh aur zunnār ke phande

dil-e-haq-bīñ ko ham is qaid se āzād karte haiñ

azaañ dete haiñ but-ḳhāne meñ jā kar shān-e-momin se

haram ke narā-e-nāqūs ham ījād karte haiñ

nikal kar apne qālib se nayā qālib basā.egī

asīrī ke liye ham ruuh ko āzād karte haiñ

mohabbat ke chaman meñ majma-e-ahbāb rahtā hai

na.ī jannat isī duniyā meñ ham ābād karte haiñ

nahīñ ghaTtī mirī āñkhoñ meñ tārīkī shab-e-ġham kī

ye taare raushnī apnī abas barbād karte haiñ

thake-māñde musāfir zulmat-e-shām-e-ġharībāñ meñ

bahār-e-jalva-e-sub.h-e-vatan ko yaad karte haiñ

dil-e-nāshād rotā hai zabāñ uf kar nahīñ saktī

koī suntā nahīñ yuuñ be-navā fariyād karte haiñ

janāb-e-shaiḳh ko ye mashq hai yād-e-ilāhī kī

ḳhabar hotī nahīñ dil ko zabāñ se yaad karte haiñ

nazar aatī hai duniyā ik ibādat-gāh-e-nūrānī

sahar kā vaqt hai bande ḳhudā ko yaad karte haiñ

sabaq umr-e-ravāñ kā dil-nashīñ hone nahīñ paatā

hamesha bhūlte jaate haiñ jo kuchh yaad karte haiñ

zamāne kā moallim imtihāñ un kā nahīñ kartā

jo āñkheñ khol kar ye dars-e-hastī yaad karte haiñ

adab ta.alīm kā jauhar hai zevar hai javānī kā

vahī shāgird haiñ jo ḳhidmat-e-ustād karte haiñ

na jaanī qadr terī umr-e-rafta ham ne collage meñ

nikal aate haiñ aañsū ab tujhe jab yaad karte haiñ

nae jhagDe nirali kawishen ijad karte hain

watan ki aabru ahl-e-watan barbaad karte hain

hawa mein uD ke sair-e-alam-e-ijad karte hain

farishte dang hain wo kaam aadam-zad karte hain

naya maslak naya rang-e-suKHan ijad karte hain

urus-e-sher ko hum qaid se aazad karte hain

mata-e-pas-e-ghairat bul-hawas barbaad karte hain

lab-e-KHamosh ko sharminda-e-faryaad karte hain

hawa-e-taza pa kar bostan ko yaad karte hain

asiran-e-qafas waqt-e-sahar fariyaad karte hain

zara ai kunj-e-marqad yaad rakhna us hamiyyat ko

ki ghar viran kar ke hum tujhe aabaad karte hain

har ek KHisht-e-kuhan afsana-e-derina kahti hai

zaban-e-haal se TuTe khanDar fariyaad karte hain

bala-e-jaan hain ye tasbih aur zunnar ke phande

dil-e-haq-bin ko hum is qaid se aazad karte hain

azan dete hain but-KHane mein ja kar shan-e-momin se

haram ke nara-e-naqus hum ijad karte hain

nikal kar apne qalib se naya qalib basaegi

asiri ke liye hum ruh ko aazad karte hain

mohabbat ke chaman mein majma-e-ahbab rahta hai

nai jannat isi duniya mein hum aabaad karte hain

nahin ghaTti meri aankhon mein tariki shab-e-gham ki

ye tare raushni apni abas barbaad karte hain

thake-mande musafir zulmat-e-sham-e-ghariban mein

bahaar-e-jalwa-e-subh-e-watan ko yaad karte hain

dil-e-nashad rota hai zaban uf kar nahin sakti

koi sunta nahin yun be-nawa fariyaad karte hain

janab-e-shaiKH ko ye mashq hai yaad-e-ilahi ki

KHabar hoti nahin dil ko zaban se yaad karte hain

nazar aati hai duniya ek ibaadat-gah-e-nurani

sahar ka waqt hai bande KHuda ko yaad karte hain

sabaq umr-e-rawan ka dil-nashin hone nahin pata

hamesha bhulte jate hain jo kuchh yaad karte hain

zamane ka moallim imtihan un ka nahin karta

jo aankhen khol kar ye dars-e-hasti yaad karte hain

adab talim ka jauhar hai zewar hai jawani ka

wahi shagird hain jo KHidmat-e-ustad karte hain

na jaani qadr teri umr-e-rafta hum ne collage mein

nikal aate hain aansu ab tujhe jab yaad karte hain