na to main hur ka maftun na pari ka aashiq

na to maiñ huur kā maftūñ na parī kā āshiq

ḳhaak ke putle kā hai ḳhaak kā putlā āshiq

saḳht-jānī se faqat maiñ hī rahā huuñ zinda

mar ga.e varna ġham-e-hijr se kiyā kyā āshiq

sarv-o-qumrī gul-o-bulbul haiñ usī ke jalve

aap ma.ashūq hai vo aap hai apnā āshiq

ishq-e-kāmil meñ to hājat amal-e-hub kī nahīñ

qais ma.ashūq banā ho ga.ī liilā āshiq

band āñkheñ thiiñ abhī mujh ko jo laayā sayyād

na to huuñ sarv kā vārafta na gul kā āshiq

pahle hī kātib-e-taqdīr ne likkhā thā hameñ

terā banda tirā fidvī tirā rusvā āshiq

aarzū hai mirī mayyat pe vo ro.e kah kar

hai ye 'ājiz' mirā shaidā mirā pyārā āshiq

na to main hur ka maftun na pari ka aashiq

KHak ke putle ka hai KHak ka putla aashiq

saKHt-jaani se faqat main hi raha hun zinda

mar gae warna gham-e-hijr se kiya kya aashiq

sarw-o-qumri gul-o-bulbul hain usi ke jalwe

aap mashuq hai wo aap hai apna aashiq

ishq-e-kaamil mein to hajat amal-e-hub ki nahin

qais mashuq bana ho gai lila aashiq

band aankhen thin abhi mujh ko jo laya sayyaad

na to hun sarw ka warafta na gul ka aashiq

pahle hi katib-e-taqdir ne likkha tha hamein

tera banda tera fidwi tera ruswa aashiq

aarzu hai meri mayyat pe wo roe kah kar

hai ye 'ajiz' mera shaida mera pyara aashiq