na apna nam na chehra badal ke aaya hun

na apnā naam na chehra badal ke aayā huuñ

ki ab kī baar maiñ rasta badal ke aayā huuñ

vo aur hoñge jo kār-e-havas pe zinda haiñ

maiñ us kī dhuup se saaya badal ke aayā huuñ

zarā bhī farq na paḌtā makāñ badalne se

vo bām-o-dar vo darīcha badal ke aayā huuñ

mujhe ḳhabar hai ki duniyā badal nahīñ saktī

isī liye to maiñ chashma badal ke aayā huuñ

vahī sulūk vahī bhiik chāhtā huuñ maiñ

vahī faqīr huuñ kaasa badal ke aayā huuñ

mujhe batāo koī kaam phir se karne kā

maiñ apnā ḳhuun pasīna badal ke aayā huuñ

maiñ ho gayā huuñ kisī niiñd kā shirākat-dār

maiñ ik hasīn kā takiya badal ke aayā huuñ

suno ki joñk lagā.ī hai maiñ ne patthar meñ

maiñ ik nigāh kā shīsha badal ke aayā huuñ

mirā tarīqa mirā khel hī nirālā hai

na maiñ zabān na lahja badal ke aayā huuñ

vahī asiir huuñ aur hai mirī vahī auqāt

maiñ is jahān meñ piñjra badal ke aayā huuñ

na apna nam na chehra badal ke aaya hun

ki ab ki bar main rasta badal ke aaya hun

wo aur honge jo kar-e-hawas pe zinda hain

main us ki dhup se saya badal ke aaya hun

zara bhi farq na paDta makan badalne se

wo baam-o-dar wo daricha badal ke aaya hun

mujhe KHabar hai ki duniya badal nahin sakti

isi liye to main chashma badal ke aaya hun

wahi suluk wahi bhik chahta hun main

wahi faqir hun kasa badal ke aaya hun

mujhe batao koi kaam phir se karne ka

main apna KHun pasina badal ke aaya hun

main ho gaya hun kisi nind ka shirakat-dar

main ek hasin ka takiya badal ke aaya hun

suno ki jonk lagai hai main ne patthar mein

main ek nigah ka shisha badal ke aaya hun

mera tariqa mera khel hi nirala hai

na main zaban na lahja badal ke aaya hun

wahi asir hun aur hai meri wahi auqat

main is jahan mein pinjra badal ke aaya hun