mujhe zindagi se KHiraj hi nahin mil raha
mujhe zindagī se ḳhirāj hī nahīñ mil rahā
abhī is se merā mizāj hī nahīñ mil rahā
maiñ banā rahā huuñ ḳhayāl-o-ḳhvāb kī bandisheñ
mirī bandishoñ ko rivāj hī nahīñ mil rahā
mujhe saltanat to milī huī hai jamāl kī
kisī ishq kā koī taaj hī nahīñ mil rahā
mujhe milne aa.egā 'shām' ko mirā ham-suḳhan
mirā ā.īna mujhe aaj hī nahīñ mil rahā
mire chārāgar ko paḌī huī hai 'ilāj kī
mujhe us kā koī 'ilāj hī nahīñ mil rahā
yūñhī phir rahā huuñ maiñ is jahān meñ shahr shahr
mujhe apne jaisā samāj hī nahīñ mil rahā
mujhe zindagi se KHiraj hi nahin mil raha
abhi is se mera mizaj hi nahin mil raha
main bana raha hun KHayal-o-KHwab ki bandishen
meri bandishon ko riwaj hi nahin mil raha
mujhe saltanat to mili hui hai jamal ki
kisi ishq ka koi taj hi nahin mil raha
mujhe milne aaega 'sham' ko mera ham-suKHan
mera aaina mujhe aaj hi nahin mil raha
mere chaaragar ko paDi hui hai 'ilaj ki
mujhe us ka koi 'ilaj hi nahin mil raha
yunhi phir raha hun main is jahan mein shahr shahr
mujhe apne jaisa samaj hi nahin mil raha
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
