mujhe KHabar nahin gham kya hai aur KHushi kya hai

mujhe ḳhabar nahīñ ġham kyā hai aur ḳhushī kyā hai

ye zindagī kī hai sūrat to zindagī kyā hai

fuġhāñ to ishq kī ik mashq-e-ibtidā.ī hai

abhī to aur baḌhegī ye lai abhī kyā hai

tamām umr isī rañj meñ tamām huī

kabhī ye tum ne na pūchā tirī ḳhushī kyā hai

tum apne ho to nahīñ ġham kisī muḳhālif kā

zamāna kyā hai falak kyā hai mudda.ī kyā hai

salāh-e-kār banāyā hai maslahat se use

vagarna nāseh-e-nādāñ kī dostī kyā hai

diloñ ko khīñch rahī hai kisī kī mast nigāh

ye dilkashī hai to phir uzr-e-mai-kashī kyā hai

mazāq ishq ko samjhoge yuuñ na tum nāseh

lagā ke dil kahīñ dekho ye dil-lagī kyā hai

vo raat din nahīñ milte to zid na kar 'ahsan'

kabhī kabhī kī mulāqāt bhī burī kyā hai

mujhe KHabar nahin gham kya hai aur KHushi kya hai

ye zindagi ki hai surat to zindagi kya hai

fughan to ishq ki ek mashq-e-ibtidai hai

abhi to aur baDhegi ye lai abhi kya hai

tamam umr isi ranj mein tamam hui

kabhi ye tum ne na pucha teri KHushi kya hai

tum apne ho to nahin gham kisi muKHalif ka

zamana kya hai falak kya hai muddai kya hai

salah-e-kar banaya hai maslahat se use

wagarna naseh-e-nadan ki dosti kya hai

dilon ko khinch rahi hai kisi ki mast nigah

ye dilkashi hai to phir uzr-e-mai-kashi kya hai

mazaq ishq ko samjhoge yun na tum naseh

laga ke dil kahin dekho ye dil-lagi kya hai

wo raat din nahin milte to zid na kar 'ahsan'

kabhi kabhi ki mulaqat bhi buri kya hai