meri duniya ka mehwar muKHtalif hai

mirī duniyā kā mehvar muḳhtalif hai

na is meñ aa ye chakkar muḳhtalif hai

mujhe ātish-ba-jāñ rakkhā gayā hai

mirī miTTī kā jauhar muḳhtalif hai

mujhe likhne se pahle soch lenā

mirā kirdār yaksar muḳhtalif hai

maiñ ḳhvāboñ se ziyāda TūTtī huuñ

ki maujūd-o-mayassar muḳhtalif hai

zarā sī mauj par hairān mat ho

yahāñ saarā samundar muḳhtalif hai

koī mānūs ḳhushbū saath utrī

lahū bolā ye nashtar muḳhtalif hai

sitāra hai koī gul hai ki dil hai

tirī Thokar meñ patthar muḳhtalif hai

tire gītoñ kā matlab aur hai kuchh

hamārā dhun sarāsar muḳhtalif hai

safar kā rañg o ruḳh ab tak vahī hai

munādī thī ki rahbar muḳhtalif hai

kisī jānib se to aa.e bashārat

fazā badlī hai manzar muḳhtalif hai

meri duniya ka mehwar muKHtalif hai

na is mein aa ye chakkar muKHtalif hai

mujhe aatish-ba-jaan rakkha gaya hai

meri miTTi ka jauhar muKHtalif hai

mujhe likhne se pahle soch lena

mera kirdar yaksar muKHtalif hai

main KHwabon se ziyaada TuTti hun

ki maujud-o-mayassar muKHtalif hai

zara si mauj par hairan mat ho

yahan sara samundar muKHtalif hai

koi manus KHushbu sath utri

lahu bola ye nashtar muKHtalif hai

sitara hai koi gul hai ki dil hai

teri Thokar mein patthar muKHtalif hai

tere giton ka matlab aur hai kuchh

hamara dhun sarasar muKHtalif hai

safar ka rang o ruKH ab tak wahi hai

munadi thi ki rahbar muKHtalif hai

kisi jaanib se to aae bashaarat

faza badli hai manzar muKHtalif hai