mere Thahrao ko kuchh aur bhi wusat di jae

mire Thahrāo ko kuchh aur bhī vus.at dī jaa.e

ab mujhe ḳhud se nikalne kī ijāzat dī jaa.e

maut se mil leñ kisī gosha-e-tanhā.ī meñ

zindagī se jo kisī din hameñ fursat dī jaa.e

be-ḳhad-o-ḳhāl sā ik chehrā liye phirtā huuñ

chāhtā huuñ ki mujhe shakl-o-shabāhat dī jaa.e

bhare bāzār meñ baiThā huuñ liye jins-e-vajūd

shart ye hai ki mirī ḳhaak kī qīmat dī jaa.e

bas ki duniyā mirī āñkhoñ meñ samā jā.egī

koī din aur mire ḳhvāb ko mohlat dī jaa.e

mere Thahrao ko kuchh aur bhi wusat di jae

ab mujhe KHud se nikalne ki ijazat di jae

maut se mil len kisi gosha-e-tanhai mein

zindagi se jo kisi din hamein fursat di jae

be-KHad-o-KHal sa ek chehra liye phirta hun

chahta hun ki mujhe shakl-o-shabahat di jae

bhare bazar mein baiTha hun liye jins-e-wajud

shart ye hai ki meri KHak ki qimat di jae

bas ki duniya meri aankhon mein sama jaegi

koi din aur mere KHwab ko mohlat di jae