milne ki jab baat hui thi

milne kī jab baat huī thī

tanhā.ī bhī paas khaḌī thī

āñkhoñ meñ tūfān aayā thā

dil kī bastī Duub ga.ī thī

maiñ ki tere dhyān meñ gum thā

duniyā mujh ko DhūñDh rahī thī

ham donoñ ḳhāmosh khaḌe the

sāvan kī pur-zor jhaḌī thī

kosoñ duur mujhe jaanā thā

paañv meñ zanjīr paḌī thī

tum se judā.ī kā kyā ronā

ye to qismat meñ likkhī thī

ḳhvāboñ ke ik shahzāde se

niind kī devī ruuTh ga.ī thī

saarī umr sulagte guzrī

maiñ thā yā giilī lakḌī thī

milne ki jab baat hui thi

tanhai bhi pas khaDi thi

aankhon mein tufan aaya tha

dil ki basti Dub gai thi

main ki tere dhyan mein gum tha

duniya mujh ko DhunDh rahi thi

hum donon KHamosh khaDe the

sawan ki pur-zor jhaDi thi

koson dur mujhe jaana tha

panw mein zanjir paDi thi

tum se judai ka kya rona

ye to qismat mein likkhi thi

KHwabon ke ek shahzade se

nind ki dewi ruTh gai thi

sari umr sulagte guzri

main tha ya gili lakDi thi