lamhon ke azab sah raha hun

lamhoñ ke azaab sah rahā huuñ

maiñ apne vajūd kī sazā huuñ

zaḳhmoñ ke gulāb khil rahe haiñ

ḳhushbū ke hujūm meñ khaḌā huuñ

is dasht-e-talab meñ ek maiñ bhī

sadiyoñ kī thakī huī sadā huuñ

is shahr-e-tarab ke shor-o-ġhul meñ

tasvīr-e-sukūt ban gayā huuñ

benām-o-numūd zindagī kā

ik bojh uThā.e phir rahā huuñ

shāyad na mile mujhe rihā.ī

yādoñ kā asiir ho gayā huuñ

ik aisā chaman hai jis kī ḳhushbū

sāñsoñ meñ basā.e phir rahā huuñ

ik aisī galī hai jis kī ḳhātir

darmāñda kū-ba-kū rahā huuñ

ik aisī zamīñ hai jis ko chhū kar

taqdīs-e-haram se āshnā huuñ

ai mujh ko fareb dene vaale

maiñ tujh pe yaqīn kar chukā huuñ

maiñ tere qarīb aate aate

kuchh aur bhī duur ho gayā huuñ

lamhon ke azab sah raha hun

main apne wajud ki saza hun

zaKHmon ke gulab khil rahe hain

KHushbu ke hujum mein khaDa hun

is dasht-e-talab mein ek main bhi

sadiyon ki thaki hui sada hun

is shahr-e-tarab ke shor-o-ghul mein

taswir-e-sukut ban gaya hun

benam-o-numud zindagi ka

ek bojh uThae phir raha hun

shayad na mile mujhe rihai

yaadon ka asir ho gaya hun

ek aisa chaman hai jis ki KHushbu

sanson mein basae phir raha hun

ek aisi gali hai jis ki KHatir

darmanda ku-ba-ku raha hun

ek aisi zamin hai jis ko chhu kar

taqdis-e-haram se aashna hun

ai mujh ko fareb dene wale

main tujh pe yaqin kar chuka hun

main tere qarib aate aate

kuchh aur bhi dur ho gaya hun