lafz jab koi na hath aaya maani ke liye

lafz jab koī na haath aayā ma.ānī ke liye

kyā maze ham ne zabān-e-be-zabānī ke liye

ye dorāhā hai chalo tum rañg-o-bū kī khoj meñ

ham chale sahrā-e-dil kī bāġhbānī ke liye

zindagī apnī thī goyā lamha-e-furqat kā tuul

kuchh maze ham ne bhī umr-e-jāvedānī ke liye

maiñ bhalā ThanDī havā se kyā ulajhtā chup rahā

phuul kī ḳhush-bū bahut thī sargirānī ke liye

TuuT paḌtī thiiñ ghaTā.eñ jin kī āñkheñ dekh kar

vo bharī barsāt meñ tarse haiñ paanī ke liye

raakh armānoñ kī giilī lakḌiyāñ ehsās kī

ham ko ye sāmāñ mile sho.ala-bayānī ke liye

sham.a ho fānūs se bāhar to gul ho jā.egī

bandish-e-alfāz mat toḌo ma.ānī ke liye

do kināre hoñ to sail-e-zindagī dariyā bane

ek had lāzim hai paanī kī ravānī ke liye

aaj kyuuñ chup chup ho 'bāqar' tum kabhī mash.hūr the

dostoñ yāroñ meñ apnī ḳhush-bayānī ke liye

lafz jab koi na hath aaya maani ke liye

kya maze hum ne zaban-e-be-zabani ke liye

ye doraha hai chalo tum rang-o-bu ki khoj mein

hum chale sahra-e-dil ki baghbani ke liye

zindagi apni thi goya lamha-e-furqat ka tul

kuchh maze hum ne bhi umr-e-jawedani ke liye

main bhala ThanDi hawa se kya ulajhta chup raha

phul ki KHush-bu bahut thi sargirani ke liye

TuT paDti thin ghaTaen jin ki aankhen dekh kar

wo bhari barsat mein tarse hain pani ke liye

rakh armanon ki gili lakDiyan ehsas ki

hum ko ye saman mile shoala-bayani ke liye

shama ho fanus se bahar to gul ho jaegi

bandish-e-alfaz mat toDo maani ke liye

do kinare hon to sail-e-zindagi dariya bane

ek had lazim hai pani ki rawani ke liye

aaj kyun chup chup ho 'baqar' tum kabhi mashhur the

doston yaron mein apni KHush-bayani ke liye