laD hi jae kisi nigar se aankh

laḌ hī jaa.e kisī nigār se aañkh

kaash Thahre kahīñ qarār se aañkh

kuchh mohabbat hai kuchh muravvat hai

aaj paḌtī hai mujh pe pyaar se aañkh

chalte rahte haiñ ḳhuub tīr-e-nigāh

baaz aatī nahīñ shikār se aañkh

TikTikī se kahāñ milī fursat

aa ga.ī aajiz intizār se aañkh

kyā paḌī hai balā ko us kī arz

kyuuñ milā.e umīd-vār se aañkh

koī tadbīr ban nahīñ paḌtī

kyā mile chashm-e-sharmsār se aañkh

nīchī nazroñ se dekh lete haiñ

kyā milā.eñ vo be-qarār se aañkh

dīd-bāzī kā jis ko lapkā hai

kab Thahartī hai iztirār se aañkh

nazroñ nazroñ meñ bāteñ hotī haiñ

ḳhuub miltī hai rāzdār se aañkh

kyuuñ ye miltī hai be-vafāoñ se

kaash laḌtī vafā-shi.ār se aañkh

kabhī dar par kabhī hai raste meñ

nahīñ thaktī hai intizār se aañkh

marne ke ba.ad bhī thī sharm un ko

ki churā.ī mire mazār se aañkh

sub.h-e-mahshar uThā nahīñ jaatā

ab bhī khultī nahīñ ḳhumār se aañkh

dil ġhanī hai mirā to kyā parvā

kab milātā huuñ māl-dār se aañkh

kyuuñ jhukā.ūñ nazar bashīr apnī

kabhī jhapkī nahīñ hazār se aañkh

laD hi jae kisi nigar se aankh

kash Thahre kahin qarar se aankh

kuchh mohabbat hai kuchh murawwat hai

aaj paDti hai mujh pe pyar se aankh

chalte rahte hain KHub tir-e-nigah

baz aati nahin shikar se aankh

TikTiki se kahan mili fursat

aa gai aajiz intizar se aankh

kya paDi hai bala ko us ki arz

kyun milae umid-war se aankh

koi tadbir ban nahin paDti

kya mile chashm-e-sharmsar se aankh

nichi nazron se dekh lete hain

kya milaen wo be-qarar se aankh

did-bazi ka jis ko lapka hai

kab Thaharti hai iztirar se aankh

nazron nazron mein baaten hoti hain

KHub milti hai raazdar se aankh

kyun ye milti hai be-wafaon se

kash laDti wafa-shiar se aankh

kabhi dar par kabhi hai raste mein

nahin thakti hai intizar se aankh

marne ke baad bhi thi sharm un ko

ki churai mere mazar se aankh

subh-e-mahshar uTha nahin jata

ab bhi khulti nahin KHumar se aankh

dil ghani hai mera to kya parwa

kab milata hun mal-dar se aankh

kyun jhukaun nazar bashir apni

kabhi jhapki nahin hazar se aankh