kya kahen wadon pe yaqin hum kyun late jate hain

kyā kaheñ va.adoñ pe yaqīñ ham kyuuñ laate jaate haiñ

dhokā khānā paḌtā hai dhokā khāte jaate haiñ

tāqat-e-zabt-e-ġham dil se ruḳhsat hotī jaatī hai

armāñ naale ban ban kar lab par aate jaate haiñ

rāteñ aish-o-ishrat kī din dukh dard musībat ke

aatī aatī aatī haiñ jaate jaate jaate haiñ

āñdhiyoñ aur bagūloñ se kam nahīñ tere dīvāne

ḳhaak uḌāte aate haiñ ḳhaak uḌāte jaate haiñ

aaj sahar se ġhair bahut haal tire bīmār kā hai

afsurda afsurda hai log jo aate jaate haiñ

mai-ḳhāna bhī paḌtā hai shaiḳh ko rāh-e-masjid meñ

mai-ḳhāna bhī aap aksar aate jaate jaate haiñ

ġhair to haiñ phir ġhair 'vafā' ġhairoñ kā shikva hī kiyā

bad-halī meñ apne bhī aañkh churāte jaate haiñ

kya kahen wadon pe yaqin hum kyun late jate hain

dhoka khana paDta hai dhoka khate jate hain

taqat-e-zabt-e-gham dil se ruKHsat hoti jati hai

arman nale ban ban kar lab par aate jate hain

raaten aish-o-ishrat ki din dukh dard musibat ke

aati aati aati hain jate jate jate hain

aandhiyon aur bagulon se kam nahin tere diwane

KHak uDate aate hain KHak uDate jate hain

aaj sahar se ghair bahut haal tere bimar ka hai

afsurda afsurda hai log jo aate jate hain

mai-KHana bhi paDta hai shaiKH ko rah-e-masjid mein

mai-KHana bhi aap aksar aate jate jate hain

ghair to hain phir ghair 'wafa' ghairon ka shikwa hi kiya

bad-hali mein apne bhi aankh churaate jate hain