kuchh to tanhai ki raaton mein sahaara hota

kuchh to tanhā.ī kī rātoñ meñ sahārā hotā

tum na hote na sahī zikr tumhārā hotā

tark-e-duniyā kā ye daavā hai fuzūl ai zāhid

bār-e-hastī to zarā sar se utārā hotā

vo agar aa na sake maut hī aa.ī hotī

hijr meñ koī to ġham-ḳhvār hamārā hotā

zindagī kitnī masarrat se guzartī yā rab

aish kī tarah agar ġham bhī gavārā hotā

azmat-e-girya ko kotāh-nazar kyā samjheñ

ashk agar ashk na hotā to sitārā hotā

lab-e-zāhid pe hai afsāna-e-hūr-e-jannat

kaash is vaqt mirā anjuman-ārā hotā

ġham-e-ulfat jo na miltā ġham-e-hastī miltā

kisī sūrat to zamāne meñ guzārā hotā

kis ko fursat thī zamāne ke sitam sahne kī

gar na us shoḳh kī āñkhoñ kā ishārā hotā

koī hamdard zamāne meñ na paayā 'aḳhtar'

dil ko hasrat hī rahī koī hamārā hotā

kuchh to tanhai ki raaton mein sahaara hota

tum na hote na sahi zikr tumhaara hota

tark-e-duniya ka ye dawa hai fuzul ai zahid

bar-e-hasti to zara sar se utara hota

wo agar aa na sake maut hi aai hoti

hijr mein koi to gham-KHwar hamara hota

zindagi kitni masarrat se guzarti ya rab

aish ki tarah agar gham bhi gawara hota

azmat-e-girya ko kotah-nazar kya samjhen

ashk agar ashk na hota to sitara hota

lab-e-zahid pe hai afsana-e-hur-e-jannat

kash is waqt mera anjuman-ara hota

gham-e-ulfat jo na milta gham-e-hasti milta

kisi surat to zamane mein guzara hota

kis ko fursat thi zamane ke sitam sahne ki

gar na us shoKH ki aankhon ka ishaara hota

koi hamdard zamane mein na paya 'aKHtar'

dil ko hasrat hi rahi koi hamara hota