kuchh baat nahin jism agar mera jala hai

kuchh baat nahīñ jism agar merā jalā hai

sad-shukr ki us bazm se sho'la to uThā hai

maanā ki mire lawn kī phir sabz huī ghaas

is meñh meñ paḌosī kā makāñ bhī to girā hai

sardī hai ki is jism se phir bhī nahīñ jaatī

sūraj hai ki muddat se mire sar pe khaḌā hai

har samt ḳhamoshī hai magar kahte haiñ kuchh log

is shahr meñ ik shor qayāmat kā bapā hai

dīvār se go iiñT khisak kar paḌī sar par

sad-shukr ki rauzan koī zindāñ meñ khulā hai

ab dekhiye kis raah meñ dīvār banegā

Dhalvān pe ik sang-e-girāñ chal to paḌā hai

is saal mire khet meñ ole bhī paḌe haiñ

is saal mirī fasl ko kiiḌā bhī lagā hai

āñkheñ mirī raushan raheñ ḳhush-hāl rahūñ maiñ

ik andhī bhikāran kī mire haq meñ du'ā hai

maiñ bhuuk se behāl huuñ to ser-shikam hai

kyā merā ḳhudā vo nahīñ jo terā ḳhudā hai

kuchh baat nahin jism agar mera jala hai

sad-shukr ki us bazm se sho'la to uTha hai

mana ki mere lawn ki phir sabz hui ghas

is meinh mein paDosi ka makan bhi to gira hai

sardi hai ki is jism se phir bhi nahin jati

suraj hai ki muddat se mere sar pe khaDa hai

har samt KHamoshi hai magar kahte hain kuchh log

is shahr mein ek shor qayamat ka bapa hai

diwar se go inT khisak kar paDi sar par

sad-shukr ki rauzan koi zindan mein khula hai

ab dekhiye kis rah mein diwar banega

Dhalwan pe ek sang-e-giran chal to paDa hai

is sal mere khet mein ole bhi paDe hain

is sal meri fasl ko kiDa bhi laga hai

aankhen meri raushan rahen KHush-haal rahun main

ek andhi bhikaran ki mere haq mein du'a hai

main bhuk se behaal hun to ser-shikam hai

kya mera KHuda wo nahin jo tera KHuda hai