kuchh baat hi thi aisi ki thame jigar gae

kuchh baat hī thī aisī ki thāme jigar ga.e

ham aur jaate bazm-e-adū meñ magar ga.e

ye to ḳhabar nahīñ ki kahāñ aur kidhar ga.e

lekin yahāñ se duur kuchh ahl-e-safar ga.e

armāñ jo ham ne jam.a kiye the shabāb meñ

piirī meñ vo ḳhudā ko ḳhabar hai kidhar ga.e

rutba buland hai mire dāġhoñ kā is qadar

maiñ huuñ zamīñ pe daaġh mire tā-qamar ga.e

ruḳhsār par hai rañg-e-hayā kā faroġh aaj

bose kā naam maiñ ne liyā vo nikhar ga.e

duniyā bas is se aur zyāda nahīñ hai kuchh

kuchh roz haiñ guzārne aur kuchh guzar ga.e

jaane lagā hai dil kī taraf un kā haath ab

naale shab-e-firāq ke kuchh kaam kar ga.e

hasrat kā ye mazā hai ki nikle nahīñ kabhī

armāñ nahīñ haiñ vo ki shab aa.e sahar ga.e

bas ek zaat hazrat-e-'shaidā' kī hai yahāñ

dehlī se rafta rafta sab ahl-e-hunar ga.e

kuchh baat hi thi aisi ki thame jigar gae

hum aur jate bazm-e-adu mein magar gae

ye to KHabar nahin ki kahan aur kidhar gae

lekin yahan se dur kuchh ahl-e-safar gae

arman jo hum ne jama kiye the shabab mein

piri mein wo KHuda ko KHabar hai kidhar gae

rutba buland hai mere daghon ka is qadar

main hun zamin pe dagh mere ta-qamar gae

ruKHsar par hai rang-e-haya ka farogh aaj

bose ka nam main ne liya wo nikhar gae

duniya bas is se aur zyaada nahin hai kuchh

kuchh roz hain guzarne aur kuchh guzar gae

jaane laga hai dil ki taraf un ka hath ab

nale shab-e-firaq ke kuchh kaam kar gae

hasrat ka ye maza hai ki nikle nahin kabhi

arman nahin hain wo ki shab aae sahar gae

bas ek zat hazrat-e-'shaida' ki hai yahan

dehli se rafta rafta sab ahl-e-hunar gae