kisi ke zaKHm par ashkon ka phaha rakh diya jae

kisī ke zaḳhm par ashkoñ kā phāhā rakh diyā jaa.e

chalo sūraj ke sar par thoḌā saaya rakh diyā jaa.e

mire mālik sar-e-shāḳh-e-shajar ik phuul kī mānind

mirī be-dāġh peshānī pe sajda rakh diyā jaa.e

gunahgāroñ ne sochā hai musalsal nekiyāñ kar ke

shab-e-zulmat ke siine par ujālā rakh diyā jaa.e

tan-e-be-sar huuñ mere saa.e meñ ab kaun baiThegā

daraḳhtoñ meñ mire hisse kā saaya rakh diyā jaa.e

bulāte haiñ hameñ mehnat-kashoñ ke haath ke chhāle

chalo muhtāj ke muñh meñ nivāla rakh diyā jaa.e

duā.eñ māñgte haiñ vo hamāre rizq kī ḳhātir

faqīroñ ke liye thoḌā sā aaTā rakh diyā jaa.e

mujhe chalne nahīñ deñge ye mere paañv ke chhāle

mire talvoñ ke nīche koī kāñTā rakh diyā jaa.e

rivājoñ kī vo kasrat hai ki dam ghuTne lagā apnā

uThā kar ab 'razā' pārīna qissa rakh diyā jaa.e

kisi ke zaKHm par ashkon ka phaha rakh diya jae

chalo suraj ke sar par thoDa saya rakh diya jae

mere malik sar-e-shaKH-e-shajar ek phul ki manind

meri be-dagh peshani pe sajda rakh diya jae

gunahgaron ne socha hai musalsal nekiyan kar ke

shab-e-zulmat ke sine par ujala rakh diya jae

tan-e-be-sar hun mere sae mein ab kaun baiThega

daraKHton mein mere hisse ka saya rakh diya jae

bulate hain hamein mehnat-kashon ke hath ke chhaale

chalo muhtaj ke munh mein niwala rakh diya jae

duaen mangte hain wo hamare rizq ki KHatir

faqiron ke liye thoDa sa aaTa rakh diya jae

mujhe chalne nahin denge ye mere panw ke chhaale

mere talwon ke niche koi kanTa rakh diya jae

riwajon ki wo kasrat hai ki dam ghuTne laga apna

uTha kar ab 'raza' parina qissa rakh diya jae