KHwab mein dekh raha hun ki haqiqat mein use

ḳhvāb meñ dekh rahā huuñ ki haqīqat meñ use

maiñ kabhī dekh nahīñ saktā musībat meñ use

vo mirā yār-e-tarah-dār ki ḳhush-fahm bhī hai

koī dhoka hī na de jaa.e mohabbat meñ use

zindagī ho to ka.ī kaam nikal aate haiñ

yaad ā.ūñgā kabhī maiñ bhī zarūrat meñ use

ik ta.alluq thā ki shīshe kī tarah TuuT gayā

joḌ saktā hī nahīñ maiñ kisī sūrat meñ use

aaj tak jism mirā TuuT rahā hai 'fāzil'

maiñ ne dekhā thā kabhī niind kī hālat meñ use

KHwab mein dekh raha hun ki haqiqat mein use

main kabhi dekh nahin sakta musibat mein use

wo mera yar-e-tarah-dar ki KHush-fahm bhi hai

koi dhoka hi na de jae mohabbat mein use

zindagi ho to kai kaam nikal aate hain

yaad aaunga kabhi main bhi zarurat mein use

ek talluq tha ki shishe ki tarah TuT gaya

joD sakta hi nahin main kisi surat mein use

aaj tak jism mera TuT raha hai 'fazil'

main ne dekha tha kabhi nind ki haalat mein use