KHush-guman har aasra be-asra sabit hua

ḳhush-gumāñ har aasrā be-āsrā sābit huā

zindagī tujh se ta.alluq khokhlā sābit huā

jab shikāyat kī kabīda-ḳhātirī hāsil huī

sabr-e-mahrūmī mirā harf-e-duā sābit huā

be-talab miltī raheñ yuuñ to hazāroñ nemateñ

the talab kī aas meñ barham to kyā sābit huā

rū-ba-rū hote hue bhī ham rahe manzil se duur

ik anā kā mas.ala zanjīr-e-pā sābit huā

aah bhar kar chal diye sab hī tamāsha dekh kar

vaqt par jo DaT gayā vo devtā sābit huā

TuuT kar bikhrā mire dil se yaqīñ kā aa.ina

maiñ use samjhā thā kyā lekin vo kyā sābit huā

saañs jo aayā badan meñ thā vafā se ham-kanār

aur jab vāpas huā to bevafā sābit huā

sar ke shaidā.ī bahut māyūs mahfil se uThe

jab 'zafar' jaisā suḳhan-var be-navā sābit huā

KHush-guman har aasra be-asra sabit hua

zindagi tujh se talluq khokhla sabit hua

jab shikayat ki kabida-KHatiri hasil hui

sabr-e-mahrumi mera harf-e-dua sabit hua

be-talab milti rahen yun to hazaron nematen

the talab ki aas mein barham to kya sabit hua

ru-ba-ru hote hue bhi hum rahe manzil se dur

ek ana ka masala zanjir-e-pa sabit hua

aah bhar kar chal diye sab hi tamasha dekh kar

waqt par jo DaT gaya wo dewta sabit hua

TuT kar bikhra mere dil se yaqin ka aaina

main use samjha tha kya lekin wo kya sabit hua

sans jo aaya badan mein tha wafa se ham-kanar

aur jab wapas hua to bewafa sabit hua

sar ke shaidai bahut mayus mahfil se uThe

jab 'zafar' jaisa suKHan-war be-nawa sabit hua