kaun kahta hai musibat par kabhi matam na kar

kaun kahtā hai musībat par kabhī mātam na kar

maut hai ik pal kī saarī zindagī mātam na kar

ġham na kar un ke darīchoñ par charāġhāñ ho gayā

chaltī phirtī hai sadā se raushnī mātam na kar

karbalā se le ke registān-e-sīnā.ī talak

miT nahīñ saktī hamārī tishnagī mātam na kar

phir se momin ātish-e-namrūd meñ Daale ga.e

hai yahī sunnat ḳhalīlullāh kī mātam na kar

kufr hai ik millat-e-vāhid ye raushan ho gayā

mustaqil hai rishta-e-īmān bhī mātam na kar

kisht-e-muslim ko hamesha ḳhuun se sīñchā gayā

ek din hogī yahī khetī harī mātam na kar

ye bhī kyā kam hai basīrat kī nazar hāsil huī

dostoñ ne kī jo tujh se dushmanī mātam na kar

'sayyadī' tārīḳh meñ ik do baras kuchh bhī nahīñ

kashmakash hai iztirāb-e-dā.imī mātam na kar

kaun kahta hai musibat par kabhi matam na kar

maut hai ek pal ki sari zindagi matam na kar

gham na kar un ke darichon par charaghan ho gaya

chalti phirti hai sada se raushni matam na kar

karbala se le ke registan-e-sinai talak

miT nahin sakti hamari tishnagi matam na kar

phir se momin aatish-e-namrud mein Dale gae

hai yahi sunnat KHalilullah ki matam na kar

kufr hai ek millat-e-wahid ye raushan ho gaya

mustaqil hai rishta-e-iman bhi matam na kar

kisht-e-muslim ko hamesha KHun se sincha gaya

ek din hogi yahi kheti hari matam na kar

ye bhi kya kam hai basirat ki nazar hasil hui

doston ne ki jo tujh se dushmani matam na kar

'sayyadi' tariKH mein ek do baras kuchh bhi nahin

kashmakash hai iztirab-e-daimi matam na kar