jo ku-e-dost ko jaun to pasban ke liye

jo kū-e-dost ko jā.ūñ to pāsbāñ ke liye

nahīñ hai ḳhvāb se behtar kuchh armuġhāñ ke liye

tamām illat-e-darmāñdagī hai qillat-e-shauq

tapish huī par-e-parvāz-e-murġh-e-jāñ ke liye

sharīk-e-bulbul-o-qumrī haiñ vo zabūñ-fitrat

jo be-qarār rahe sair-e-gulsitāñ ke liye

umiid hai ki nibāheñge imtihāñ le kar

jo is qadar mutaqāzī haiñ imtihāñ ke liye

na ḳhākiyoñ se ta'alluq na qudsiyoñ se rabt

na ham zamīñ ke liye haiñ na āsmāñ ke liye

payām-e-dost huā qāsidoñ ko vaj.h-e-sharaf

nasīm-e-misr se 'izzat hai kārvāñ ke liye

qafas zamāna o jaañ murġh o āshiyāñ malakūt

qafas meñ murġh hai betāb āshiyāñ ke liye

fasāne yuuñ mohabbat ke sach haiñ par kuchh kuchh

baḌhā bhī dete haiñ ham zeb-e-dāstāñ ke liye

hamārī nazm meñ hai 'shefta' vo kaifiyyat

ki kuchh rahī na haqīqat mai-e-muġhāñ ke liye

jo ku-e-dost ko jaun to pasban ke liye

nahin hai KHwab se behtar kuchh armughan ke liye

tamam illat-e-darmandagi hai qillat-e-shauq

tapish hui par-e-parwaz-e-murgh-e-jaan ke liye

sharik-e-bulbul-o-qumri hain wo zabun-fitrat

jo be-qarar rahe sair-e-gulsitan ke liye

umid hai ki nibahenge imtihan le kar

jo is qadar mutaqazi hain imtihan ke liye

na KHakiyon se ta'alluq na qudsiyon se rabt

na hum zamin ke liye hain na aasman ke liye

payam-e-dost hua qasidon ko wajh-e-sharaf

nasim-e-misr se 'izzat hai karwan ke liye

qafas zamana o jaan murgh o aashiyan malakut

qafas mein murgh hai betab aashiyan ke liye

fasane yun mohabbat ke sach hain par kuchh kuchh

baDha bhi dete hain hum zeb-e-dastan ke liye

hamari nazm mein hai 'shefta' wo kaifiyyat

ki kuchh rahi na haqiqat mai-e-mughan ke liye