jazba-e-mohabbat ko tir-e-be-KHata paya

jazba-e-mohabbat ko tīr-e-be-ḳhatā paayā

maiñ ne jab use dekhā dekhtā huā paayā

jānte ho kyā paayā pūchhte ho kyā paayā

sub.h-dam darīche meñ ek ḳhat paḌā paayā

der meñ pahuñchne par bahs to huī lekin

us kī be-qarārī ko hasb-e-mudda.ā paayā

sub.h tak mire ham-rāh aañkh bhī na jhapkā.ī

maiñ ne har sitāre ko dard-āshnā paayā

girya-e-judā.ī ko sahl jānñe vaalo

dil se aañkh kī jānib ḳhuun dauḌtā paayā

ehtimām-e-parda ne khol diiñ na.ī rāheñ

vo jahāñ chhupā jā kar merā sāmnā paayā

dil ko moh letī hai dil-kashi-e-nazzāra

aañkh kī ḳhatāoñ meñ dil ko mubtalā paayā

rañg laa.ī nā āḳhir tark-e-nāz-bardārī

haath joḌ kar us ko mahv-e-iltijā paayā

'shād' ġhair-mumkin hai shikva-e-butāñ mujh se

maiñ ne jis se ulfat kī us ko bā-vafā paayā

jazba-e-mohabbat ko tir-e-be-KHata paya

main ne jab use dekha dekhta hua paya

jaante ho kya paya puchhte ho kya paya

subh-dam dariche mein ek KHat paDa paya

der mein pahunchne par bahs to hui lekin

us ki be-qarari ko hasb-e-muddaa paya

subh tak mere ham-rah aankh bhi na jhapkai

main ne har sitare ko dard-ashna paya

girya-e-judai ko sahl jaanne walo

dil se aankh ki jaanib KHun dauDta paya

ehtimam-e-parda ne khol din nai rahen

wo jahan chhupa ja kar mera samna paya

dil ko moh leti hai dil-kashi-e-nazzara

aankh ki KHataon mein dil ko mubtala paya

rang lai na aaKHir tark-e-naz-bardari

hath joD kar us ko mahw-e-iltija paya

'shad' ghair-mumkin hai shikwa-e-butan mujh se

main ne jis se ulfat ki us ko ba-wafa paya