ishq ki duniya mein kya kya hum ko saughaten milin

ishq kī duniyā meñ kyā kyā ham ko sauġhāteñ milīñ

suunī sub.heñ rotī shāmeñ jāgtī rāteñ milīñ

yā barastī dhuup meñ tapte sulagte din mile

yā ridā-e-dard meñ lipTī huī rāteñ milīñ

kuchh sabāhat kuchh malāhat thī nasīb-e-āshiqāñ

āñsuoñ ke rañg meñ namkīn barsāteñ milīñ

gah ujaḌ jaane kā mātam gah bichhaḌ jaane kā shor

dil ke andar jab milīñ nauhoñ kī bārāteñ milīñ

khokhle chehroñ pe sīm-o-zar kī thiiñ ārā.isheñ

ahl-e-ma.anī ko magar lafzoñ kī ḳhairāteñ milīñ

khelne vaale to bas das biis shatranjī rahe

dekhne vāloñ ko shah-mātoñ pe shah-māteñ milīñ

zalzale aa.e to jo paikar the sañg-o-ḳhisht ke

un ke hoñToñ par duā.eñ aur munājāteñ milīñ

ishq ko fikr-o-shu.ūr-e-zindagī darkār thā

aur use nā-puḳhta zehnoñ kī karāmāteñ milīñ

ham unhī ko sher kā qālib atā karte rahe

be-sadā hoñToñ pe jo bikhrī huī bāteñ milīñ

kis tarah kahte 'karam' duniyā se apne dil kā haal

dostoñ se bhī adhūrī sī mulāqāteñ milīñ

ishq ki duniya mein kya kya hum ko saughaten milin

suni subhen roti shamen jagti raaten milin

ya barasti dhup mein tapte sulagte din mile

ya rida-e-dard mein lipTi hui raaten milin

kuchh sabahat kuchh malahat thi nasib-e-ashiqan

aansuon ke rang mein namkin barsaten milin

gah ujaD jaane ka matam gah bichhaD jaane ka shor

dil ke andar jab milin nauhon ki baraaten milin

khokhle chehron pe sim-o-zar ki thin aaraishen

ahl-e-mani ko magar lafzon ki KHairaaten milin

khelne wale to bas das bis shatranji rahe

dekhne walon ko shah-maton pe shah-maten milin

zalzale aae to jo paikar the sang-o-KHisht ke

un ke honTon par duaen aur munajaten milin

ishq ko fikr-o-shuur-e-zindagi darkar tha

aur use na-puKHta zehnon ki karamaten milin

hum unhi ko sher ka qalib ata karte rahe

be-sada honTon pe jo bikhri hui baaten milin

kis tarah kahte 'karam' duniya se apne dil ka haal

doston se bhi adhuri si mulaqaten milin