ek aah-e-zer-e-lab ke gunahgar ho gae

ik āh-e-zer-e-lab ke gunahgār ho ga.e

ab ham bhī dāḳhil-e-saf-e-aġhyār ho ga.e

jis dard ko samajhte the ham un kā faiz-e-ḳhās

us dard ke bhī laakh ḳharīdār ho ga.e

jin hausloñ se merā junūñ mutma.in na thā

vo hausle zamāne ke meyār ho ga.e

saaqī ke ik ishāre ne kyā sehr kar diyā

ham bhī shikār-e-andak-o-bisyār ho ga.e

ab un laboñ meñ shahad o shakar ghul ga.e to kyā

jab ham halāk-e-talḳhi-e-guftār ho ga.e

har vaada jaise harf-e-ġhalat thā sarāb thā

ham to nisār-e-jur.at-e-inkār ho ga.e

terī nazar payām-e-yaqīñ de ga.ī magar

kuchh taaza vasvase bhī to bedār ho ga.e

is mai-kade meñ uchhlī hai dastār bār-hā

vaa.iz yahāñ kahāñ se numūdār ho ga.e

sarsabz pattiyoñ kā lahū chuus chuus kar

kitne hī phuul raunaq-e-gulzār ho ga.e

'zaidī' ne taaza sher sunā.e ba-rañg-e-ḳhās

ham bhī fidā-e-shoḳhi-e-inkār ho ga.e

ek aah-e-zer-e-lab ke gunahgar ho gae

ab hum bhi daKHil-e-saf-e-aghyar ho gae

jis dard ko samajhte the hum un ka faiz-e-KHas

us dard ke bhi lakh KHaridar ho gae

jin hauslon se mera junun mutmain na tha

wo hausle zamane ke meyar ho gae

saqi ke ek ishaare ne kya sehr kar diya

hum bhi shikar-e-andak-o-bisyar ho gae

ab un labon mein shahad o shakar ghul gae to kya

jab hum halak-e-talKHi-e-guftar ho gae

har wada jaise harf-e-ghalat tha sarab tha

hum to nisar-e-jurat-e-inkar ho gae

teri nazar payam-e-yaqin de gai magar

kuchh taza waswase bhi to bedar ho gae

is mai-kade mein uchhli hai dastar bar-ha

waiz yahan kahan se numudar ho gae

sarsabz pattiyon ka lahu chus chus kar

kitne hi phul raunaq-e-gulzar ho gae

'zaidi' ne taza sher sunae ba-rang-e-KHas

hum bhi fida-e-shoKHi-e-inkar ho gae