hua kare agar usko koi gila hoga

huā kare agar us ko koī gila hogā

zabāñ khulī hai to phir kuchh to faisla hogā

kabhī kabhī to ye dil meñ savāl uThtā hai

ki is judā.ī meñ kyā us ne pā liyā hogā

vo garm garm nafas kaise Thahrte hoñge

ab in shaboñ ko vo kaise guzārtā hogā

kabhī jo guzrūñ tire shahr se to sochtā huuñ

ki is zamīn pe kyā kyā qadam paḌā hogā

ḳhushā vo raunaq-e-hañgāma-e-visāl ab to

yaqīn hī nahīñ aatā ki yuuñ huā hogā

vo khoī khoī vafāoñ kā bhūlā-bisrā giit

kabhī to us ke shabistāñ meñ bhī gayā hogā

nikal paḌe the yūñhī ham to ek din ghar se

kise ḳhabar thī ki yuuñ tum se sāmnā hogā

kabhī uThe hī nahīñ ham talāsh ko varna

koī to shahr meñ apnā bhī āshnā hogā

ye haul-nāk ḳhamoshī judā.ī kā āshob

maiñ sochtā huuñ ki yūñhī rahā to kyā hogā

kis aarzū meñ uThe kis taraf chale 'anjum'

is aadhī raat meñ ab kis kā dar khulā hogā

hua kare agar us ko koi gila hoga

zaban khuli hai to phir kuchh to faisla hoga

kabhi kabhi to ye dil mein sawal uThta hai

ki is judai mein kya us ne pa liya hoga

wo garm garm nafas kaise Thahrte honge

ab in shabon ko wo kaise guzarta hoga

kabhi jo guzrun tere shahr se to sochta hun

ki is zamin pe kya kya qadam paDa hoga

KHusha wo raunaq-e-hangama-e-visal ab to

yaqin hi nahin aata ki yun hua hoga

wo khoi khoi wafaon ka bhula-bisra git

kabhi to us ke shabistan mein bhi gaya hoga

nikal paDe the yunhi hum to ek din ghar se

kise KHabar thi ki yun tum se samna hoga

kabhi uThe hi nahin hum talash ko warna

koi to shahr mein apna bhi aashna hoga

ye haul-nak KHamoshi judai ka aashob

main sochta hun ki yunhi raha to kya hoga

kis aarzu mein uThe kis taraf chale 'anjum'

is aadhi raat mein ab kis ka dar khula hoga