hazar KHak ke zarron mein mil gaya hun main

hazār ḳhaak ke zarroñ meñ mil gayā huuñ maiñ

ma.āl-e-shauq huuñ ā.īna-e-vafā huuñ maiñ

kahāñ ye vus.at-e-jalva kahāñ ye dīda-e-tañg

kabhī tujhe kabhī apne ko dekhtā huuñ maiñ

shahīd-e-ishq ke jalve kī intihā hī nahīñ

hazār rañg se aalam meñ rū-numā huuñ maiñ

mirā vajūd haqīqat mirā adam dhokā

fanā kī shakl meñ sar-chashma-e-baqā huuñ maiñ

hai terī aañkh meñ pinhāñ mirā vajūd o adam

nigāh pher le phir dekh kyā se kyā huuñ maiñ

mirā vajūd bhī thā koī chiiz kyā mālūm

is e'tibār se pahle hī miT chukā huuñ maiñ

shumār kis meñ karūñ nisbat-e-haqīqī ko

ḳhudā nahīñ huuñ magar maz.har-e-ḳhudā huuñ maiñ

mirā nishāñ nigah-e-haq-nagar pe hai mauqūf

na ḳhud-shanās huuñ 'hādī' na ḳhud-numā huuñ maiñ

hazar KHak ke zarron mein mil gaya hun main

maal-e-shauq hun aaina-e-wafa hun main

kahan ye wusat-e-jalwa kahan ye dida-e-tang

kabhi tujhe kabhi apne ko dekhta hun main

shahid-e-ishq ke jalwe ki intiha hi nahin

hazar rang se aalam mein ru-numa hun main

mera wajud haqiqat mera adam dhoka

fana ki shakl mein sar-chashma-e-baqa hun main

hai teri aankh mein pinhan mera wajud o adam

nigah pher le phir dekh kya se kya hun main

mera wajud bhi tha koi chiz kya malum

is e'tibar se pahle hi miT chuka hun main

shumar kis mein karun nisbat-e-haqiqi ko

KHuda nahin hun magar mazhar-e-KHuda hun main

mera nishan nigah-e-haq-nagar pe hai mauquf

na KHud-shanas hun 'hadi' na KHud-numa hun main