hawas luT liye shorish-e-tamanna ne

havās luuT liye shorish-e-tamannā ne

harī rutoñ ke liye ban ga.e haiñ dīvāne

badalte der nahīñ lagtī ab haqīqat ko

jo kal kī bāteñ haiñ vo aaj ke haiñ afsāne

hai ab to qat-e-ta.alluq kī ek hī sūrat

ḳhudā kare tū hameñ dekh kar na pahchāne

jo tere kūche se nikle to ik tamāsha the

ajiib nazroñ se dekhā hai ham ko duniyā ne

safar meñ koī kisī ke liye Thahartā nahīñ

na muḌ ke dekhā kabhī sāhiloñ ko dariyā ne

ḳhizāñ ne dast-e-basārat ko Das liyā 'fāriġh'

chale the qāfla-e-fasl-e-gul ko Thahrāne

hawas luT liye shorish-e-tamanna ne

hari ruton ke liye ban gae hain diwane

badalte der nahin lagti ab haqiqat ko

jo kal ki baaten hain wo aaj ke hain afsane

hai ab to qat-e-talluq ki ek hi surat

KHuda kare tu hamein dekh kar na pahchane

jo tere kuche se nikle to ek tamasha the

ajib nazron se dekha hai hum ko duniya ne

safar mein koi kisi ke liye Thaharta nahin

na muD ke dekha kabhi sahilon ko dariya ne

KHizan ne dast-e-basarat ko Das liya 'farigh'

chale the qafla-e-fasl-e-gul ko Thahrane