hasrat hai tujhe samne baiThe kabhi dekhun

hasrat hai tujhe sāmne baiThe kabhī dekhūñ

maiñ tujh se muḳhātib huuñ tirā haal bhī pūchhūñ

dil meñ hai mulāqāt kī ḳhvāhish kī dabī aag

mehñdī lage hāthoñ ko chhupā kar kahāñ rakkhūñ

jis naam se tū ne mujhe bachpan se pukārā

ik 'umr guzarne pe bhī vo naam na bhūlūñ

tū ashk hī ban ke mirī āñkhoñ meñ samā jā

maiñ ā.īna dekhūñ to tirā aks bhī dekhūñ

pūchhūñ kabhī ġhunchoñ se sitāroñ se havā se

tujh se hī magar aa ke tirā naam na pūchhūñ

jo shaḳhs ki hai ḳhvāb meñ aane se bhī ḳhā.if

ā.īna-e-dil meñ use maujūd hī dekhūñ

ai merī tamannā ke sitāre tū kahāñ hai

tū aa.e to ye jism shab-e-ġham ko na sauñpūñ

hasrat hai tujhe samne baiThe kabhi dekhun

main tujh se muKHatib hun tera haal bhi puchhun

dil mein hai mulaqat ki KHwahish ki dabi aag

mehndi lage hathon ko chhupa kar kahan rakkhun

jis nam se tu ne mujhe bachpan se pukara

ek 'umr guzarne pe bhi wo nam na bhulun

tu ashk hi ban ke meri aankhon mein sama ja

main aaina dekhun to tera aks bhi dekhun

puchhun kabhi ghunchon se sitaron se hawa se

tujh se hi magar aa ke tera nam na puchhun

jo shaKHs ki hai KHwab mein aane se bhi KHaif

aaina-e-dil mein use maujud hi dekhun

ai meri tamanna ke sitare tu kahan hai

tu aae to ye jism shab-e-gham ko na saunpun