hasinon se faqat sahib-salamat dur ki achchhi

hasīnoñ se faqat sāhib-salāmat duur kī achchhī

na un kī dostī achchhī na un kī dushmanī achchhī

zamāna fasl-e-gul kā aur āġhāz-e-shabāb apnā

abhī se tū ne tauba kī bhī ai zāhid kahī achchhī

jafā-dost us ko kahtā hai koī koī vafā-dushman

hamāre saath to us ne nibāhī dostī achchhī

tirī ḳhātir se zāhid ham ne tauba aaj kī varna

ghaḌī bhar ġham ġhalat karne ko bas vo chiiz thī achchhī

ziyāda ai falak de ranj-o-rāhat ham ko jo kuchh de

na do din kā ye ġham achchhā na do din kī ḳhushī achchhī

kabhī jab haath mal kar un se kahtā huuñ ki be-bas huuñ

to vo hañs kar ye kahte haiñ tumhārī bebasī achchhī

jo sach pūchho hasīnoñ kā hayā ne rakh liyā parda

nikal chalte gharoñ se ye to hotī dil-lagī achchhī

ham aa.eñ aap meñ yā-rab vo jis dam aa.eñ bālīñ par

hujūm-e-ranj-e-tanhā.ī se hai ye be-ḳhudī achchhī

mohabbat ke maze se dil nahīñ hai āshnā jis kā

na us kī zindagī achchhī na us kī maut hī achchhī

vo mai-kash huuñ ki de kar duunī qīmat sab kī sab le lī

kisī se jab sunā maiñ ne ki bhaTTī meñ khiñchī achchhī

use duniyā kī sau fikreñ hameñ ik rang-e-nādārī

kahīñ mun.im kī daulat se hamārī muflisī achchhī

ḳhushī ke baa'd ġham kā sāmnā honā qayāmat hai

jo ġham ke baa'd hāsil ho vo albatta ḳhushī achchhī

na chūTegī mohabbat ġhair kī ham se na chūTegī

ajī ye baat tum ne aaj to khul kar kahī achchhī

hamāre dīda-o-dil meñ hazāroñ 'aib nikleñge

tumhārā aa.inā achchhā tumhārī aarsī achchhī

tire is jubba-o-dastār se rindoñ ko kyā matlab

jise jo vaz' ho marġhūb ai zāhid vahī achchhī

kahe sau sher tum ne sust to hāsil 'hafīz' is kā

ġhazal ho chust chhoTī sī to baitoñ kī kamī achchhī

hasinon se faqat sahib-salamat dur ki achchhi

na un ki dosti achchhi na un ki dushmani achchhi

zamana fasl-e-gul ka aur aaghaz-e-shabab apna

abhi se tu ne tauba ki bhi ai zahid kahi achchhi

jafa-dost us ko kahta hai koi koi wafa-dushman

hamare sath to us ne nibahi dosti achchhi

teri KHatir se zahid hum ne tauba aaj ki warna

ghaDi bhar gham ghalat karne ko bas wo chiz thi achchhi

ziyaada ai falak de ranj-o-rahat hum ko jo kuchh de

na do din ka ye gham achchha na do din ki KHushi achchhi

kabhi jab hath mal kar un se kahta hun ki be-bas hun

to wo hans kar ye kahte hain tumhaari bebasi achchhi

jo sach puchho hasinon ka haya ne rakh liya parda

nikal chalte gharon se ye to hoti dil-lagi achchhi

hum aaen aap mein ya-rab wo jis dam aaen baalin par

hujum-e-ranj-e-tanhai se hai ye be-KHudi achchhi

mohabbat ke maze se dil nahin hai aashna jis ka

na us ki zindagi achchhi na us ki maut hi achchhi

wo mai-kash hun ki de kar duni qimat sab ki sab le li

kisi se jab suna main ne ki bhaTTi mein khinchi achchhi

use duniya ki sau fikren hamein ek rang-e-nadari

kahin munim ki daulat se hamari muflisi achchhi

KHushi ke ba'd gham ka samna hona qayamat hai

jo gham ke ba'd hasil ho wo albatta KHushi achchhi

na chuTegi mohabbat ghair ki hum se na chuTegi

aji ye baat tum ne aaj to khul kar kahi achchhi

hamare dida-o-dil mein hazaron 'aib niklenge

tumhaara aaina achchha tumhaari aarsi achchhi

tere is jubba-o-dastar se rindon ko kya matlab

jise jo waz' ho marghub ai zahid wahi achchhi

kahe sau sher tum ne sust to hasil 'hafiz' is ka

ghazal ho chust chhoTi si to baiton ki kami achchhi