har but yahan TuTe hue patthar ki tarah hai

har but yahāñ TuuTe hue patthar kī tarah hai

ye shahr to ujḌe hue mandar kī tarah hai

maiñ tishna-e-dīdār ki jhoñkā huuñ havā kā

vo jhiil meñ utre hue manzar kī tarah hai

kam-zarf zamāne kī hiqārat kā gila kyā

maiñ ḳhush huuñ mirā pyaar samundar kī tarah hai

is charḳh kī taqdīs kabhī raat ko dekho

ye qabr pe phailī huī chādar kī tarah hai

maiñ sang-e-tah-e-āb kī sūrat huuñ jahāñ meñ

aur vaqt bhī so.e hue sāgar kī tarah hai

rote haiñ bagūle mire dāman se lipaT kar

sahrā bhī tabī'at meñ mire ghar kī tarah hai

ash'ār mire dard kī ḳhairāt haiñ 'aḳhtar'

ik shaḳhs ye kahtā thā ki ġham zar kī tarah hai

har but yahan TuTe hue patthar ki tarah hai

ye shahr to ujDe hue mandar ki tarah hai

main tishna-e-didar ki jhonka hun hawa ka

wo jhil mein utre hue manzar ki tarah hai

kam-zarf zamane ki hiqarat ka gila kya

main KHush hun mera pyar samundar ki tarah hai

is charKH ki taqdis kabhi raat ko dekho

ye qabr pe phaili hui chadar ki tarah hai

main sang-e-tah-e-ab ki surat hun jahan mein

aur waqt bhi soe hue sagar ki tarah hai

rote hain bagule mere daman se lipaT kar

sahra bhi tabi'at mein mere ghar ki tarah hai

ash'ar mere dard ki KHairaat hain 'aKHtar'

ek shaKHs ye kahta tha ki gham zar ki tarah hai