hamein KHabar bhi nahin yar khinchta hai koi

hameñ ḳhabar bhī nahīñ yaar khīñchtā hai koī

hamāre beach meñ dīvār khīñchtā hai koī

ye kaisā dasht-e-tahayyur hai yaañ se kuuch karo

hamāre paañv se raftār khīñchtā hai koī

hai chaak chaak hamāre lahū kā pairāhan

hamārī ruuh se jhankār khīñchtā hai koī

maiñ chal rahā huuñ musalsal binā tavaqquf ke

mujhe ba-sūrat-e-parkār khīñchtā hai koī

yahāñ to māl-e-ġhanīmat samajh rahe haiñ sabhī

qabā bachāo to dastār khīñchtā hai koī

use sikhāo ki tahzīb-e-guftugū kyā hai

zarā sī baat pe talvār khīñchtā hai koī

hai mirā naam bhī is mahzar-e-shahādat meñ

mujhe bhī lashkar-e-inkār khīñchtā hai koī

munāf-e-jazb-e-darūñ maiñ huuñ in dinoñ 'shāhid'

mujhe ik aks-e-pur-asrār khīñchtā hai koī

hamein KHabar bhi nahin yar khinchta hai koi

hamare beach mein diwar khinchta hai koi

ye kaisa dasht-e-tahayyur hai yan se kuch karo

hamare panw se raftar khinchta hai koi

hai chaak chaak hamare lahu ka pairahan

hamari ruh se jhankar khinchta hai koi

main chal raha hun musalsal bina tawaqquf ke

mujhe ba-surat-e-parkar khinchta hai koi

yahan to mal-e-ghanimat samajh rahe hain sabhi

qaba bachao to dastar khinchta hai koi

use sikhao ki tahzib-e-guftugu kya hai

zara si baat pe talwar khinchta hai koi

hai mera nam bhi is mahzar-e-shahadat mein

mujhe bhi lashkar-e-inkar khinchta hai koi

munaf-e-jazb-e-darun main hun in dinon 'shahid'

mujhe ek aks-e-pur-asrar khinchta hai koi