hamari jit hui hai ki donon haare hain

hamārī jiit huī hai ki donoñ haare haiñ

bichhaḌ ke ham ne ka.ī raat din guzāre haiñ

hanūz siine kī chhoTī sī qabr ḳhālī hai

agarche is meñ janāze ka.ī utāre haiñ

vo ko.ele se mirā naam likh chukā to use

sunā hai dekhne vāloñ ne phuul maare haiñ

ye kis balā kī zabāñ āsmāñ ko chaaT ga.ī

ki chāñd hai na kahīñ kahkashāñ na taare haiñ

mujhe bhī ḳhud se adāvat huī to zāhir hai

ki apne dost mujhe zindagī se pyāre haiñ

nahīñ ki arsa-e-girdāb hī ġhanīmat thā

magar yaqīñ to dilāo yahī kināre haiñ

ġhalat ki koī sharīk-e-safar nahīñ 'aslam'

sulagte aks haiñ jalte hue ishāre haiñ

hamari jit hui hai ki donon haare hain

bichhaD ke hum ne kai raat din guzare hain

hanuz sine ki chhoTi si qabr KHali hai

agarche is mein janaze kai utare hain

wo koele se mera nam likh chuka to use

suna hai dekhne walon ne phul mare hain

ye kis bala ki zaban aasman ko chaT gai

ki chand hai na kahin kahkashan na tare hain

mujhe bhi KHud se adawat hui to zahir hai

ki apne dost mujhe zindagi se pyare hain

nahin ki arsa-e-girdab hi ghanimat tha

magar yaqin to dilao yahi kinare hain

ghalat ki koi sharik-e-safar nahin 'aslam'

sulagte aks hain jalte hue ishaare hain