hum zamane se faqat husn-e-guman rakhte hain

ham zamāne se faqat husn-e-gumāñ rakhte haiñ

ham zamāne se tavaqqo hī kahāñ rakhte haiñ

ek lamha bhī masarrat kā bahut hotā hai

log jiine kā salīqa hī kahāñ rakhte haiñ

kuchh hamāre bhī sitāre tire dāman pe raheñ

ham bhī kuchh ḳhvāb jahān-e-guzrāñ rakhte haiñ

chand aañsū haiñ ki hastī kī chamak hai jin se

kuchh havādis haiñ ki duniyā ko javāñ rakhte haiñ

jān-o-dil nazr haiñ lekin nigāh-e-lutf kī nazr

muft bikte haiñ qayāmat bhī girāñ rakhte haiñ

apne hisse kī masarrat bhī aziyyat hai 'zamīr'

har nafas pās-e-ġham-e-ham-nafasāñ rakhte haiñ

hum zamane se faqat husn-e-guman rakhte hain

hum zamane se tawaqqo hi kahan rakhte hain

ek lamha bhi masarrat ka bahut hota hai

log jine ka saliqa hi kahan rakhte hain

kuchh hamare bhi sitare tere daman pe rahen

hum bhi kuchh KHwab jahan-e-guzran rakhte hain

chand aansu hain ki hasti ki chamak hai jin se

kuchh hawadis hain ki duniya ko jawan rakhte hain

jaan-o-dil nazr hain lekin nigah-e-lutf ki nazr

muft bikte hain qayamat bhi giran rakhte hain

apne hisse ki masarrat bhi aziyyat hai 'zamir'

har nafas pas-e-gham-e-ham-nafasan rakhte hain