humne dekha hai itne khanDar KHwab mein

ham ne dekhā hai itne khañDar ḳhvāb meñ

ab to lagtā nahīñ ham ko Dar ḳhvāb meñ

apnī barsoñ se hai ik vahī aarzū

roz aa jaa.e hai jo nazar ḳhvāb meñ

vaqt aane pe sab ko ġhashī aa ga.ī

jo batāte the ḳhud ko niDar ḳhvāb meñ

zulm kī āñdhiyāñ baḌh ke tūfāñ huiiñ

mast duniyā hai par raat bhar ḳhvāb meñ

ishq kī ye masāfat bhī kyā ḳhuub hai

chāñd taare hue rahguzar ḳhvāb meñ

un se hotā hai har raat ahd-e-vafā

aur nibhāte haiñ ham beshtar ḳhvāb meñ

roz o shab kho ga.e haiñ na jaane kahāñ

ab to hotī hai shaam o sahar ḳhvāb meñ

jo bahut mo'tabar aa rahe haiñ nazar

un ke hote haiñ kār-e-digar ḳhvāb meñ

zindagī kī haqīqat ajab ho ga.ī

aaj kal ho rahī hai basar ḳhvāb meñ

hum ne dekha hai itne khanDar KHwab mein

ab to lagta nahin hum ko Dar KHwab mein

apni barson se hai ek wahi aarzu

roz aa jae hai jo nazar KHwab mein

waqt aane pe sab ko ghashi aa gai

jo batate the KHud ko niDar KHwab mein

zulm ki aandhiyan baDh ke tufan huin

mast duniya hai par raat bhar KHwab mein

ishq ki ye masafat bhi kya KHub hai

chand tare hue rahguzar KHwab mein

un se hota hai har raat ahd-e-wafa

aur nibhate hain hum beshtar KHwab mein

roz o shab kho gae hain na jaane kahan

ab to hoti hai sham o sahar KHwab mein

jo bahut mo'tabar aa rahe hain nazar

un ke hote hain kar-e-digar KHwab mein

zindagi ki haqiqat ajab ho gai

aaj kal ho rahi hai basar KHwab mein