hum agar radd-e-amal apna dikhane lag jaen

ham agar radd-e-amal apnā dikhāne lag jaa.eñ

har ghamanDī ke yahāñ hosh Thikāne lag jaa.eñ

ḳhāksāroñ se kaho hosh meñ aane lag jaa.eñ

is se pahle ki vo nazroñ se girāne lag jaa.eñ

dekhnā ham kahīñ phūle na samāne lag jaa.eñ

indiya jaise hī kuchh kuchh tirā paane lag jaa.eñ

phuul chehre ye sar-e-rāh sitāra āñkheñ

shaam hote hī tirā naam sujhāne lag jaa.eñ

apnī auqāt meñ rahnā dil-e-ḳhush-fahm zarā

vo guzārish pe tirī sar na khujāne lag jaa.eñ

haDDiyāñ baap kī guude se huī haiñ ḳhālī

kam se kam ab to ye beTe bhī kamāne lag jaa.eñ

ek bil se kahīñ do baar Dasā hai momin

zaḳhm-ḳhurda haiñ to phir zaḳhm na khāne lag jaa.eñ

dāva-e-ḳhush-suḳhanī 'ḳhair' abhī zeb nahīñ

chand ġhazloñ hī pe baġhleñ na bajāne lag jaa.eñ

hum agar radd-e-amal apna dikhane lag jaen

har ghamanDi ke yahan hosh Thikane lag jaen

KHaksaron se kaho hosh mein aane lag jaen

is se pahle ki wo nazron se girane lag jaen

dekhna hum kahin phule na samane lag jaen

indiya jaise hi kuchh kuchh tera pane lag jaen

phul chehre ye sar-e-rah sitara aankhen

sham hote hi tera nam sujhane lag jaen

apni auqat mein rahna dil-e-KHush-fahm zara

wo guzarish pe teri sar na khujaane lag jaen

haDDiyan bap ki gude se hui hain KHali

kam se kam ab to ye beTe bhi kamane lag jaen

ek bil se kahin do bar Dasa hai momin

zaKHm-KHurda hain to phir zaKHm na khane lag jaen

dawa-e-KHush-suKHani 'KHair' abhi zeb nahin

chand ghazlon hi pe baghlen na bajaane lag jaen