ghar lauTte hain jab bhi koi yar ganwa kar

ghar lauTte haiñ jab bhī koī yaar gañvā kar

ro lete haiñ ham-zād ko siine se lagā kar

kis ko thī ḳhabar is meñ taḌaḳh jā.egā dil bhī

ham ḳhush the bahut sehn meñ dīvār uThā kar

kuchh aur bhī baḌh jaatī haiñ hairāniyāñ dil kī

sau baar kahā hai ki na ā.īna takā kar

sāvan meñ to ḳhud-sozī bhī ho jaatī hai nākām

relā sā guzar jaatā hai sab azm bujhā kar

maiñ tark-e-ta.alluq pe bhī āmāda huuñ lekin

tū bhī to mirā qarz-e-ġham-e-hijr adā kar

ye tai hai ki ab ham ne nahīñ milnā dobāra

ye baat magar aur kisī se na kahā kar

is kār-e-mohabbat meñ to hotā hai ḳhasāra

ai sāhab-e-zar tū ye tijārat na kyā kar

ik shahad sā ghultā chalā jaatā hai dahan meñ

letā huuñ maiñ jab saañs tirī saañs milā kar

ghar lauTte hain jab bhi koi yar ganwa kar

ro lete hain ham-zad ko sine se laga kar

kis ko thi KHabar is mein taDaKH jaega dil bhi

hum KHush the bahut sehn mein diwar uTha kar

kuchh aur bhi baDh jati hain hairaniyan dil ki

sau bar kaha hai ki na aaina taka kar

sawan mein to KHud-sozi bhi ho jati hai nakaam

rela sa guzar jata hai sab azm bujha kar

main tark-e-talluq pe bhi aamada hun lekin

tu bhi to mera qarz-e-gham-e-hijr ada kar

ye tai hai ki ab hum ne nahin milna dobara

ye baat magar aur kisi se na kaha kar

is kar-e-mohabbat mein to hota hai KHasara

ai sahab-e-zar tu ye tijarat na kya kar

ek shahad sa ghulta chala jata hai dahan mein

leta hun main jab sans teri sans mila kar