ghamon ki raat hai aur itni muKHtasar bhi nahin

ġhamoñ kī raat hai aur itnī muḳhtasar bhī nahīñ

bahut dinoñ se tumhārī koī ḳhabar bhī nahīñ

ai shahr-e-dil tirī galiyoñ meñ ḳhaak uḌtī hai

ye kyā huā ki yahāñ koī nauhagar bhī nahīñ

tū mere saath nahīñ hai to sochtā huuñ maiñ

ki ab to tujh se bichhaḌne kā koī Dar bhī nahīñ

maiñ apnā dard kisī aur se kahūñ kaise

mire badan pe koī zaḳhm-e-mo'atabar bhī nahīñ

chalāo teġh ki ab is meñ sochnā kyā hai

mire harīf mire haath meñ sipar bhī nahīñ

haiñ terī fat.h meñ ab bhī shikast ke imkān

mirī shikast meñ andesha-e-zafar bhī nahīñ

jo vāshgāf kare mere ramz ko 'shāhid'

suḳhan-varoñ meñ koī aisā dīda-var bhī nahīñ

ghamon ki raat hai aur itni muKHtasar bhi nahin

bahut dinon se tumhaari koi KHabar bhi nahin

ai shahr-e-dil teri galiyon mein KHak uDti hai

ye kya hua ki yahan koi nauhagar bhi nahin

tu mere sath nahin hai to sochta hun main

ki ab to tujh se bichhaDne ka koi Dar bhi nahin

main apna dard kisi aur se kahun kaise

mere badan pe koi zaKHm-e-mo'atabar bhi nahin

chalao tegh ki ab is mein sochna kya hai

mere harif mere hath mein sipar bhi nahin

hain teri fath mein ab bhi shikast ke imkan

meri shikast mein andesha-e-zafar bhi nahin

jo washgaf kare mere ramz ko 'shahid'

suKHan-waron mein koi aisa dida-war bhi nahin