gham ke bharose kya kuchh chhoDa kya ab tum se bayan karen

ġham ke bharose kyā kuchh chhoḌā kyā ab tum se bayān kareñ

ġham bhī raas na aayā dil ko aur hī kuchh sāmān kareñ

karne aur kahne kī bāteñ kis ne kahīñ aur kis ne kiiñ

karte kahte dekheñ kisī ko ham bhī koī paimān kareñ

bhalī burī jaisī bhī guzrī un ke sahāre guzrī hai

hazrat-e-dil jab haath baḌhā.eñ har mushkil āsān kareñ

ek Thikānā aage aage pīchhe ek musāfir hai

chalte chalte saañs jo TuuTe manzil kā elaan kareñ

'mīr' mile the 'mīrā-jī' se bātoñ se ham jaan ga.e

faiz kā chashma jaarī hai hifz un kā bhī dīvān kareñ

gham ke bharose kya kuchh chhoDa kya ab tum se bayan karen

gham bhi ras na aaya dil ko aur hi kuchh saman karen

karne aur kahne ki baaten kis ne kahin aur kis ne kin

karte kahte dekhen kisi ko hum bhi koi paiman karen

bhali buri jaisi bhi guzri un ke sahaare guzri hai

hazrat-e-dil jab hath baDhaen har mushkil aasan karen

ek Thikana aage aage pichhe ek musafir hai

chalte chalte sans jo TuTe manzil ka elan karen

'mir' mile the 'mira-ji' se baaton se hum jaan gae

faiz ka chashma jari hai hifz un ka bhi diwan karen