gae wo din ki koi gham-shanas aaega

ga.e vo din ki koī ġham-shanās aa.egā

jo aa gayā bhī to kyā dil ko raas aa.egā

chalo to rāh-e-mohabbat meñ be-talab ho kar

maza safar kā to bin-bhūk-pyās aa.egā

madad ko jis kī khaḌā huuñ maiñ sar-nigūñ ho kar

baḌe ġhurūr meñ vo nā-sipās aa.egā

vo sāf-go hai magar baat kā hunar sīkhe

badan hasīñ hai to kyā be-libās aa.egā

ajab nahīñ ki tire dar pe ek roz ye shaḳhs

har ek samt se ho kar udaas aa.egā

maiñ dūriyoñ kā nayā baab khol rakhtā huuñ

abhī vo shaḳhs mire aur paas aa.egā

gae wo din ki koi gham-shanas aaega

jo aa gaya bhi to kya dil ko ras aaega

chalo to rah-e-mohabbat mein be-talab ho kar

maza safar ka to bin-bhuk-pyas aaega

madad ko jis ki khaDa hun main sar-nigun ho kar

baDe ghurur mein wo na-sipas aaega

wo saf-go hai magar baat ka hunar sikhe

badan hasin hai to kya be-libas aaega

ajab nahin ki tere dar pe ek roz ye shaKHs

har ek samt se ho kar udas aaega

main duriyon ka naya bab khol rakhta hun

abhi wo shaKHs mere aur pas aaega