duniya se tan ko Dhanp qayamat se jaan ko

duniyā se tan ko Dhāñp qayāmat se jaan ko

do chādareñ bahut haiñ tirī ān-bān ko

ik maiñ hī rah gayā huuñ kiye sar ko bār-e-dosh

kyā pūchhte ho bhaa.ī mire ḳhāndān ko

jis din se apne chāk-e-garebāñ kā shor hai

taale lagā ga.e haiñ rafūgar dukān ko

filhāl dil pe dil to liye jā rahe ho tum

aur jo hisāb bhuul gayā kal-kalān ko

dil meñ se chun ke ham bhī koī ġhuncha ai nasīm

bhejeñge tere haath kabhī gulsitān ko

mashġhūl haiñ safā.ī-o-tausi-e-dil meñ ham

tañgī na is makān meñ ho mehmān ko

duniya se tan ko Dhanp qayamat se jaan ko

do chadaren bahut hain teri aan-ban ko

ek main hi rah gaya hun kiye sar ko bar-e-dosh

kya puchhte ho bhai mere KHandan ko

jis din se apne chaak-e-gareban ka shor hai

tale laga gae hain rafugar dukan ko

filhaal dil pe dil to liye ja rahe ho tum

aur jo hisab bhul gaya kal-kalan ko

dil mein se chun ke hum bhi koi ghuncha ai nasim

bhejenge tere hath kabhi gulsitan ko

mashghul hain safai-o-tausi-e-dil mein hum

tangi na is makan mein ho mehman ko